Pirja e sasisë më të madhe të ujit, e pamjaftueshme kundër rikthimit të gurëve në veshkë

Pirja e sasisë më të madhe të ujit nuk mjafton gjithmonë për të parandaluar rikthimin e gurëve në veshkë, sipas një studimi të ri të publikuar në The Lancet, ka raportuar SciTechDaily.

Gurët në veshka janë depozita të forta mineralesh që mund të shkaktojnë dhimbje shumë të forta dhe shpesh kërkojnë trajtim urgjent.

Rreth 1 në 11 persona zhvillon gurë në veshka, dhe pothuajse gjysma e tyre përjetojnë rikthim më vonë. Pikërisht për këtë arsye, parandalimi është po aq i rëndësishëm sa trajtimi.

Studimi, i udhëhequr nga Duke Clinical Research Institute dhe Urinary Stone Disease Research Network, ka analizuar nëse një program i posaçëm mund t’i ndihmojë njerëzit të pinë mjaftueshëm lëngje për të ulur rrezikun.

Në studim morën pjesë 1,658 adoleshentë dhe të rritur në disa qendra të mëdha mjekësore në SHBA, përfshirë Mayo Clinic dhe Cleveland Clinic. Ata u ndoqën për dy vjet, duke e bërë këtë studim më të madhin të këtij lloji.

Rezultatet treguan se edhe pse pjesëmarrësit rritën sasinë e ujit që pinin, kjo nuk ishte e mjaftueshme për të ulur ndjeshëm mundësinë e rikthimit të gurëve.

“Rezultatet tregojnë se, edhe pse pirja e shumë lëngjeve është e rëndësishme për parandalim, arritja dhe mbajtja e këtij niveli është më e vështirë nga sa mendojmë. Kjo vështirësi ndikon në shkallën e lartë të rikthimit”, ka thënë autori kryesor i studimit Charles Scales.

Programi përfshinte metoda moderne si shishe uji inteligjente (Bluetooth), mesazhe kujtuese, objektiva të personalizuara dhe këshillim shëndetësor. Qëllimi ishte që pjesëmarrësit të arrinin të urinonin të paktën 2.5 litra urinë në ditë.

Megjithatë, studiuesit theksuan se nevojat për lëngje ndryshojnë nga personi në person, në varësi të moshës, trupit, stilit të jetesës dhe shëndetit.

“Duhet të largohemi nga ideja që të gjithë pacientët duhet të ndjekin të njëjtin objektiv. Duhet të kuptojmë kush përfiton nga cilat masa dhe pse njerëzit nuk arrijnë t’u përmbahen rekomandimeve”, ka thënë bashkautori i studimit Gregory E. Tasian.

Ndërsa një tjetër anëtare e ekipit të studiuesve, Alana Desai, ka shtuar se gurët në veshka janë sëmundje kronike që mund të ndërpresë jetën e përditshme me dhimbje të forta dhe të papritura.

“Shumica e njerëzve do të donin një mënyrë të thjeshtë për të ulur rrezikun e rikthimit”, ka thënë ajo.

Studimi sugjeron se në të ardhmen, parandalimi duhet të jetë më i personalizuar, duke përfshirë jo vetëm sasinë e ujit, por edhe faktorë të tjerë si dieta, zakonet e përditshme dhe trajtime që ndihmojnë në mbajtjen e mineraleve të tretura në urinë.