Pesë mënyra për të marrë magnez pa pasur nevojë për suplemente

Suplementet me magnez janë ndër më të përdorurat dhe sipas The Washington Post kjo nuk është rastësi.

Ekspertët thonë se magnezi luan rol shumë të rëndësishëm për shëndetin.

Ai ndihmon në rregullimin e tensionit të gjakut dhe nivelit të sheqerit, mbështet sistemin imunitar dhe shëndetin e muskujve, si dhe ndihmon për gjumë më të mirë.

Magnezi qetëson sistemin nervor, relakson trupin dhe ndihmon në prodhimin e melatoninës, hormonit të gjumit.

Mungesa e rëndë e magnezit është e rrallë dhe zakonisht lidhet me sëmundje si problemet me veshkat, sëmundja e “Crohnit” apo çrregullime të tjera të metabolizmit dhe tretjes, të cilat e bëjnë më të vështirë përthithjen e tij.

Nëse një person është i shëndetshëm, edhe nëse nuk merr mjaftueshëm magnez, trupi përpiqet të kompensojë. Për shembull, veshkat mund të reduktojnë sasinë e magnezit që nxirret nga trupi.

“Trupi ka mënyra shumë të zgjuara për ta ricikluar magnezin dhe për ta mbajtur atë. Por, edhe pa mungesë të plotë, nëse ushqeheni keq, rritet rreziku për sëmundje të zemrës, rezistencë ndaj insulinës dhe tension të lartë”, ka shpjeguar Doerfler.

Prandaj, këshilla e saj është e qartë që fillimisht njerëzit të shikojnë se çka hanë.

“Para se të mendoni për suplemente, shikoni dietën tuaj. Magnezin mund ta merrni lehtësisht nga ushqimet e duhura bimore”, ka thënë ajo.

Si të rrisni marrjen e magnezit

Ja disa ide të thjeshta që mund t’i shtoni në rutinën javore:

Farat e kungullit janë burim i shkëlqyer, vetëm një çerek filxhani mbulon rreth 40 për qind të nevojës ditore.

Sallatat me quinoa, rukola dhe qiqra janë shumë të pasura me magnez dhe fibra.

Fasulet e zeza janë zgjedhje ekonomike dhe shumë ushqyese, plot proteina, fibra dhe magnez.

Djathi Tofu i përgatitur me perime është një vakt i shpejtë dhe i pasur me minerale.

Avokado, sidomos në kombinim me drithëra të plota dhe vezë, ofron magnez, fibra dhe vitamina të rëndësishme.

“Ka shumë interes për magnezin kohët e fundit, pothuajse të gjithë pacientët e mi po më pyesin për të. Ka shumë njerëz që vuajnë nga pagjumësia dhe shumë prej tyre më pyesin: ‘A mund të përdor magnez, a mund të më ndihmojë?’”, ka thënë dietologia klinike Bethany Marie Doerfler nga Northwestern Digestive Health Center.

Për shumicën e njerëzve, rritja e marrjes së magnezit mund të jetë e dobishme, jo vetëm për gjumin, por për shëndetin në përgjithësi.

Studimet tregojnë se njerëzit që konsumojnë më shumë magnez kanë rrezik më të ulët për sëmundje të zemrës dhe sulm në tru. Ata gjithashtu kanë densitet më të lartë të eshtrave, gjë që i mbron nga frakturat dhe osteoporoza.

Megjithatë, pavarësisht këtyre përfitimeve, pothuajse gjysma e njerëzve nuk marrin sasinë e rekomanduar të magnezit.

Zgjidhja është më e thjeshtë sesa duket, dhe në shumicën e rasteve nuk kërkon suplemente.

“A ka nevojë një person mesatar të marrë suplemente me magnez? Shkurt: jo. Duhet të rrisim sasinë e ushqimeve bimore në dietën tonë”, ka thënë Doerfler.

Nevojat ndryshojnë sipas moshës dhe gjinisë:

Gratë nga 19 deri në 30 vjeç kanë nevojë për rreth 310 miligram (mg) në ditë (350 mg gjatë shtatzënisë)

Gratë mbi 31 vjeç kanë nevojë për rreth 320 mg në ditë

Burrat nga 19 deri në 30 vjeç kanë nevojë për rreth 400 mg në ditë

Burrat mbi 31 vjeç kanë nevojë për rreth 420 mg në ditë