FDA-ja miraton analizën e parë të gjakut për ndihmë në diagnostikimin e Alzheimerit

Testi është për personat mbi 55 vjeç që shfaqin shenja të sëmundjes

Administrata Amerikane e Ushqimit dhe Barnave (FDA) ka miratuar për herë të parë një test gjaku që ndihmon në diagnostikimin e sëmundjes Alzheimer. Testi, i zhvilluar nga kompania “Fujirebio Diagnostics”, është i destinuar për personat mbi 55 vjeç që tashmë shfaqin simptoma të çrregullimeve mendore, ka raportuar ABC News.

Alzheimeri është një sëmundje neurodegjenerative që dëmton gradualisht kujtesën dhe aftësinë për të menduar. Një nga shenjat kryesore të kësaj sëmundjeje janë pllakat amiloide, grumbuj proteinash që shfaqen si pika të errëta në skanime të veçanta të trurit.

Si funksionon testi i ri?

Testi i gjakut mat raportin mes dy proteinave në plazmën e gjakut: pTau217 dhe β-amiloid 1-42. Ky raport lidhet me praninë ose mungesën e pllakave amiloide në tru, një tregues i fortë i Alzheimerit.

Në një studim klinik me rreth 500 pacientë me probleme të njohjes, mbi 91% e atyre që dolën pozitivë në testin e gjakut kishin rezultate të konfirmuara me mjete të tjera diagnostike. Po ashtu, mbi 97% e rezultateve negative u konfirmuan si të sakta.

Kjo do të thotë se testi ofron një mundësi më të lehtë, më pak invazive dhe më të qasshme për të nisur procesin e diagnostikimit, krahasuar me metodat aktuale si PET skaneri i trurit dhe një tjetër procedurë që njihet si punkcioni spinal, e cila bëhet me marrjen e gjakut nga shtylla kurrizore, të dyja procedura të shtrenjta dhe jo të lehta për pacientin.

“Një hap i madh përpara”

“Ky test gjaku do t’u mundësojë mjekëve të nisin procesin e diagnostikimit. Kjo është me shumë rëndësi, sepse pacientët zakonisht presin me muaj të tërë për t’u ekzaminuar nga një neurolog”, ka thënë për ABC News neurologia Leah Croll, pedagoge në Universitetin Shëndetësor SUNY Downstate.

Megjithatë, një rezultat pozitiv nga ky test nuk është përfundimtar. Ai duhet të pasohet nga testime të tjera dhe vlerësime klinike për të vendosur diagnozën përfundimtare.

Rreziqet dhe kufizimet

FDA-ja ka paralajmëruar për mundësinë e rezultateve jo të sakta, si pozitive ashtu edhe negative.

“Vetëm mendimi se mund të kesh Alzheimer është i mjaftueshëm për të shkaktuar ankth dhe shqetësim të madh te pacientët”, ka theksuar Croll, duke shpjeguar rrezikun e rezultateve pozitive jo të sakta.

Nga ana tjetër, një rezultat negativ jo i saktë mund të çojë në vonesa të panevojshme për fillimin e trajtimit dhe analiza të tepërta.

FDA nënvizon se testi nuk duhet të përdoret si mjet i vetëm për diagnozë. Mjekët duhet të mbështeten edhe në të dhëna të tjera klinike për të vendosur trajtimin e duhur.

Diagnoza e hershme, trajtim më i mirë

Aktualisht, ekzistojnë disa barna që ndihmojnë në trajtimin e fazave të lehta dhe të moderuara të Alzheimerit. Ndaj zbulimi dhe diagnoza e hershme janë thelbësore për të ngadalësuar përkeqësimin e funksioneve njohëse.

“Tani që kemi barna që funksionojnë për Alzheimerin në fazën e hershme, një diagnozë e saktë dhe në kohë është më e rëndësishme se kurrë”, ka thënë Croll.

Një sëmundje në rritje

Sipas Qendrës Amerikane për Kontrollin dhe Parandalimin e Sëmundjeve (CDC), gati 7 milionë amerikanë vuajnë nga sëmundja e Alzheimerit, dhe kjo shifër pritet të dyfishohet deri në vitin 2060.

Sipas ekspertëve, testi i ri i gjakut mund të shënojë kthesë të madhe në mënyrën se si mjekët i qasen kësaj sëmundjeje, duke lehtësuar rrugën drejt diagnozës dhe trajtimit më të hershëm.