-
Nga:
Donisa Fazliu
- 17 korrik 2025 19:28
- Shpërndaje në:
Gjykata Themelore në Prishtinë e ka dënuar me 15 vjet burgim Sllavisha Filiqin, i cili është i akuzuar në gjykimin në mungesë, për veprën penale “Krime lufte kundër popullatës civile”. Sipas trupit gjykues, ai bashkë me dy zyrtarë të tjerë e kanë maltretuar mjekun Hafir Shala, i cili është i zhdukur që nga lufta
Sllavisha Filiq është shpallur fajtor të enjten për krime lufte dhe është dënuar me 15 vjet burgim.
Në procesin gjyqësor në mungesë, Gjykata Themelore në Prishtinë e ka bërë atë përgjegjës për maltretimin e doktorit Hafir Shala, i cili pas arrestimit, gjatë luftës, është zhdukur.
Filiq ka qenë pjesëtar i Sigurimit Shtetëror të Serbisë.
Kryetarja e trupit gjykues, Violeta Namani-Hajra, ka thënë se disa dëshmitarë e kanë parë atë dhe dy persona të tjerë ende të paidentifikuar, tek e maltretojnë doktorin nga Drenasi, i cili ka ndihmuar civilë dhe pjesëtarë të Ushtrisë Çlirimtare (UÇK).
“Që nga momenti i ndalimit nga pjesëtarët e policisë serbe, pra pjesëtarët e sigurimit shtetëror të Serbisë, e kanë përshkruar se si e kanë marrë doktor Hafir Shalën, ku e kanë dërguar atë dhe se dëshmitari Shaban Neziri, gjatë dëshmisë së tij, është shprehur i sigurt se britmat që i kanë dëgjuar në objektin e ish-Sekretariatit të Punëve të Brendshme në Prishtinë, ishin të doktor Hafir Shalës, i cili u është nënshtruar rrahjeve dhe torturave. Këta dëshmitarë në detaje e kanë përshkruar pamjen e të pandehurit Sllavisha Filiq”, ka thënë gjyqtarja Namani-Hajra.
Edhe
Filiqi dënohet me 15 vjet burgim për rrëmbimin dhe zhdukjen e mjekut Hafir Shala
Gjykimi është zhvilluar në mungesë, pasi që Filiqi ndodhet në Serbi dhe nuk u është bindur thirrjeve për t’u përballur me procesin gjyqësor.
Dënimin e tij e kanë mirëpritur familjarët e doktorit të zhdukur me forcë.
“Shpallja e këtij aktvendimi sot nuk është fundi i këtij procesi, për shkak se është vetëm fillimi drejt një procesi që na pret në të ardhmen. Siç dihet, Sllavisha Filiq, krimineli i dënuar, nuk ka qenë i vetëm kur është arrestuar babai. Me të kanë qenë edhe dy persona të tjerë. Por fakti është që babi nuk është arrestuar në një kontroll rutinore. Ka ekzistuar një urdhërarrest, e baza ka qenë Beogradi”, ka theksuar Gentrit Shala, djali i Hafir Shalës.
Vendimin e ka mirëpritur edhe Prokuroria Speciale, e cila në shtator të 2023-tës ka ngritur aktakuzë për gjykim në mungesë kundër Filiqit.
“Ky vendim e përbën një hap të rëndësishëm drejt vendosjes së drejtësisë për viktimat dhe familjarët e tyre, dhe konfirmon se askush nuk është mbi ligjin, pavarësisht kohës që ka kaluar apo vendndodhjes aktuale të të pandehurit”, kanë thënë në Prokurorinë Speciale.
Edhe
Filiqi akuzohet për rrëmbimin dhe zhdukjen e mjekut Hafir Shala
Emrin e mjekut, që në luftë e ka ndihmuar popullatën civile dhe ushtarët e UÇK-së, e mban Qendra Kryesore e Mjekësisë Familjare në Drenas.
Më 2016, ish-presidenti Hashim Thaçi e pati nxjerrë dekretin me të cilin Shala është shpallur “Hero i Kosovës”.
