Në mungesë të shkresave në serbisht, shtyhet gjykimi për të akuzuarin për krime lufte

Seanca fillestare për krime lufte ndaj të akuzuarit, Jusuf Shujak, është shtyrë për 13 shkurt. Zhvillimi i seancës për vrasjen e tre civilëve në Gjakovë u pamundësua, pasi mbrojtja e të akuzuarit nuk u pajis me shkresa të lëndës të përkthyera në gjuhën serbe. E megjithëkëtë, dëshmitari Dukagjin Dyla i shpalosi rrethanat se si ndodhën vrasjet në majin e 1999-s

Është shtyrë për 13 shkurt seanca fillestare ndaj të akuzuarit për krime lufte në Gjakovë, Jusuf Shujak, shkaku i mospajisjes së mbrojtjes së tij me shkresa të lëndës, të përkthyera në gjuhën serbe. 

Aktakuza e ngritur nga Prokuroria Speciale e ngarkon Shujakun, boshnjak me kombësi, se ka marrë pjesë në vrasjen e tre civilëve shqiptarë në Gjakovë, si dhe për dëbim dhe shkatërrim e plaçkitje të pronës së familjes Dyla nga kjo komunë, në majin e vitit 1999. 

Prokurori Kastriot Memaj, e arsyetoi mungesën e shkresave të lëndës në serbishte me numrin e vogël të përkthyesve në prokurori. 

E kryetari i trupit gjykues, Lutfi Shala, konstatoi se shqyrtimi fillestar nuk mund të mbahet, pa i pasur i akuzuari të gjitha shkresat në gjuhën që e kupton. 

“Ashtu siç tha edhe prokurori special, nuk janë përmbushur kushtet që seanca e sotme të vazhdojë”, ka thënë gjyqtari Shala.

Edhe Arbëri 14 kor 2025 Shtyhet seanca për krime lufte në Gjakovë, shkak përkthimi

Për ta përcjellë seancën fillestare, para Gjykatës Themelore në Prishtinë u paraqit njëri nga dëshmitarët, Dukagjin Dyla. 

E pasi seanca u shty, ai tregoi se në shtëpinë e tij, iu vra babai Muhamet Dyla, dhe dy të tjerë – Isa Lokaj e Cenë Hajdaraj. Ai tha se rastin e ka paraqitur në shoqatën që e udhëhiqte, Afrim Caka, menjëherë pas luftës. 

Ai tha se në shtëpinë e tij ende i ka gjurmët e krimit të forcave serbe.  

“Unë ende në shtëpi i kam shenjat nëpër qyngjet të ullukut kur i kanë vrarë, që i kanë pushkatu ata dy, Isën dhe Cenën”, ka thënë dëshmitari Dyla. 

Mbetjet mortore të tri viktimave që u vranë nga forca serbe, sipas aktakuzës, u gjetën në vendtrajnimin e policisë serbe në Batajnicë, më 2001 e 2002. Lidhur me të akuzuarin Shujak, në aktakuzë thuhet se mori pjesë në vrasjen e tyre. 

“Fillimisht i urdhëruan të dëmtuarit dhe viktimat që të dilnin në oborr, mirëpo brenda kishte mbetur Muhamet Dyla, pastaj me të dalë në oborrin e shtëpisë, një polic serb i ndalon viktimat Cenë Hajdaraj dhe Isa Lokaj dhe ua kishte kërkuar letërnjoftimet, pastaj njëri nga pjesëtaret e forcave serbe u kishte thënë ‘ah ju qenkeni UÇK’ dhe menjëherë kishte shtënë me armë në drejtim të tyre dhe i vret që të dy, kurse një polic tjetër kishte hyrë në shtëpi ku po qëndronte Muhamet Dyla”, thuhet në aktakzuë.

Edhe LAJMET E MBRËMJES 15 sht 2026 Mbrojtja lë pa nisur seancën për Masakrën e Mejës dhe atë për dëbimin e shqiptarëve

Në dokument thuhet po ashtu se forcat serbe, ku bënte pjesë i pandehuri, e detyruan familjen Dyla të largohej nga shtëpia, nën kërcënimin e armëve, e pasi i vranë tre civilët, e plaçkitën shtëpinë dhe më pas e dogjën. 

Tre nga katër dëshmitarë, sipas aktakuzës, e kanë identifikuar të pandehurit në polici nëpërmjet fotografive. Në deklaratën në prokurori, i akuzuari ka thënë se ka qenë në Plavë ditën kur janë vrarë viktimat.