Kritikohet Osmani për mosshfrytëzimin e të drejtës për t’i falur të burgosurit

Mundësia e presidencës që t’i falë të burgosurit po kërkohet që të shfrytëzohet. Kryetari i KMDLNJ-së, Behxhet Shala, thotë se kjo do të ndikonte në sjellje më të mira të të burgosurve dhe në ulje të numrit të të arratisurve. E ky vit është i treti me radhë që presidentja e Kosovës, Vjosa Osmani, nuk e ka falur asnjë të burgosur. Në këtë institucion nga viti 2021 deri më sot numri i kërkesave të parashtruara për falje nga personat dënuar është 469, sipas Shërbimit Korrektues të Kosovës.

Mosshfrytëzimin e të drejtës së faljes të të burgosurve nga presidentja po e kritikojnë jurist e përfaqësues institucionesh për të drejta të njeriut.

Sipas avokatit Ardian Bajraktari, presidentja ka në dorë një sërë masash për falje që mund t’i aplikojë dhe që i parashohin ligji dhe Kushtetua.

“Falja në vetvete nënkupton lirimin e plotë apo të pjesshëm nga dënimi, zëvendësimin e dënimit më një dënim më të butë ose lirim me kusht. Po ashtu, përfshinë edhe çështjen e shlyerjes nga evidenca e të dënuarve”, tha Bajraktari.

Edhe Behxhet Shala, kryetar i Komisionit për Mbrojtjen e të Drejtave dhe Lirive të Njeriut, ka kritika ndaj institucionit të Presidencës sa i përket abstenimit nga kjo e drejtë që iu ofrohet.

Shala tha se në vit janë diku 300 deri në 500 kërkesa për falje.

Ai tha se shfrytëzimi i kësaj të drejte nga presidentja do të shtynte të burgosurit drejt sjelljeve më të mira.

Shala faljen e konsideron mëshirë nga shteti dhe se, sipas tij, kjo ndikon edhe te rritja e numrit të të arratisurve.

“Për ne si KMDLNJ është e pa kuptueshme, e pa pranueshme dhe jo normale që në mesin e 500 të burgosurve, për katër vjet mbi 2000 kërkesa që të mos të jetë një i vetëm i cili i plotëson kushtet për falje. Në konsiderojmë që ka shumë të burgosur, të dënuar të cilët i plotësojnë kushtet për falje pa e rrezikuar situatën e sigurisë”, tha Shala.

E ky vit është i treti me radhë që presidentja e Kosovës, Vjosa Osmani, nuk  ka falur asnjë të burgosur.

Lidhur  me këtë çështje KOHA ka kërkuar edhe koment nga zyra e presidentes Vjosa Osmani, por gjatë së dielës nuk ka marrë përgjigje.

Në Kosovë që nga viti 2009 ekziston Ligji për Faljen.