-
Nga:
Augustin Palokaj
- 3 qershor 2025 19:04
- Shpërndaje në:
Kosova, në dhjetor të vitit 2022 ka dorëzuar formalisht kërkesën për anëtarësim në BE, por ajo asnjëherë nuk është shqyrtuar nga ana e Këshillit. Disa vende anëtare thonë se përparimi në dialog me Serbinë do t’i ndihmonte Kosovës që të lëvizte nga pozicioni që ka në procesin e zgjerimit. Kosova është i vetmi vend në Evropë, që ka kërkuar anëtarësim në BE dhe nuk ka status kandidati
Komisionerja e Bashkimit Evropian për Zgjerim, Marta Kos, ka thënë të martën në një debat në Komisionin e Politikës së Jashtme të Parlamentit Evropian se Komisioni është i gatshëm të përpilojë mendimin për kërkesën e anëtarësimit të Kosovës në BE kur Këshilli ta kërkojë një gjë të tillë. Por ka nënvizuar nevojën që Kosova të formojë sa më shpejtë institucionet e saj dhe të ketë parasysh se përparimi drejt BE-së lidhet me dialogun me Serbinë.
“Në Kosovë, pas zgjedhjeve të shkurtit, është esenciale që shpejt të formohen institucionet dhe të lëvizet përpara me reformat kyçe në drejtësi, media dhe administratën publike. Një qeveri funksionale dhe një Kuvend janë të domosdoshëm në mënyrë që Kosova të përfitojë nga plani i reformave dhe rritjes”, ka thënë komisionerja Kos. “Komisioni mbetet i gatshëm të përgatisë mendimin për anëtarësimin e Kosovës në BE kur të marrë një kërkesë të tillë nga Këshilli. Por, më lejoni të jem e qartë, rruga e Kosovës drejt BE-së shkon përmes normalizimit të raporteve me Beogradin e jo përmes veprimeve në njëanshme”.
Kosova, në dhjetor të vitit 2022 ka dorëzuar formalisht kërkesën për anëtarësim në BE, por ajo asnjëherë nuk është shqyrtuar nga ana e Këshillit.
Sipas procedurave në BE, vendet anëtare në Këshill duhet të mandatojnë Komisionin Evropian për të përpiluar mendimin nëse Kosova i përmbush apo jo kushtet për status kandidati. Pastaj vendimet në bazë të atij mendimi i merr Këshilli duke vepruar njëzëri nga të gjitha vendet anëtare. Dhe këtu është pengesa kryesore për Kosovën, pasi ende nuk njihet nga 5 vendet anëtare të BE-së.
Disa vende anëtare thonë se përparimi në dialog me Serbinë do t’i ndihmonte Kosovës që të lëvizte nga pozicioni që ka në procesin e zgjerimit.
Kosova është i vetmi vend në Evropë, që ka kërkuar anëtarësim në BE dhe nuk ka status kandidati.
