I dyshuari për therjen e 4 personave në Ferizaj ishte i dënuar për vrasje

Burri që dyshohet se të hënën theri me thikë katër persona në Ferizaj ka qenë më parë i dënuar për vrasjen e një gruaje. 

Në Prokurorinë Themelore në Ferizaj kanë thënë se fillimisht është arrestuar një person tjetër gabimisht, meqë ai i ishte përshtatur profilit të të dyshuarit. 

Zëdhënësja e Prokurorisë, Vjosa Baftiu, ka treguar të martën se i dyshuari është dërguar në mbajtje dhe brenda afatit prej 48 orësh do të kërkohet masa e paraburgimit ndaj tij.

“Rasti i parë i therjes i dy të miturave ka ndodhur në rrugën ‘Rifat Berisha’, më pas i njëjti ka vazhduar në lokacionin, konkretisht në rrugën ‘Enver Topalli’, ku ka sulmuar viktimën e tretë dhe më pas ka vazhduar në rrugën ‘Halim Spahia’ dhe ka sulmuar edhe viktimën e katërt”, ka thënë Baftiu.

KOHA ka dërguar pyetje në Gjykatën Themelore në Ferizaj lidhur me të kaluarën kriminale të të dyshuarit F.I., se sa ka qëndruar në burg, kur është liruar dhe a është rehabilituar gjatë kohës së qëndrimit prapa grilave. 

Edhe Kronikë 12 nën 2024 Arrestohet i dyshuari për therjet në Ferizaj, ishte dënuar për vrasjen e një gruaje

Në përgjigjen e Gjykatës thuhet se ende nuk është bërë identifikimi zyrtar i të dyshuarit.

“Deri më tani Gjykata Themelore në Ferizaj nuk ka pranuar ndonjë kërkesë nga ana e Prokurorisë Themelore në Ferizaj lidhur me të dyshuarin, të cilin ju e keni cekur dhe për këtë arsye ne nuk mundemi të ofrojmë ndonjë përgjigje pasi që ende nuk është bërë i ditur identifikimi zyrtar i të dyshuarit, sepse për të identifikuar aktgjykimet e plotfuqishme ndaj të njëjtit do të duhej të kishim të dhëna më shumë se emri dhe mbiemri”, thuhet në përgjigjen e gjykatës.

Dy nga katër viktimat e sulmit të së hënës i janë nënshtruar ndërhyrjes kirurgjikale.

Drejtori i Klinikës Intensive në QKUK, Shaqir Uka, ka thënë se gjendja e tyre shëndetësore është stabile, ndonëse kanë marrë plagë serioze.

Edhe Kronikë 13 nën 2024 Një muaj paraburgim të dyshuarit për therjet në Ferizaj

“Lëndimet janë serioze, janë lëndime në regjionin e gjoksit, të cilat kanë prekur edhe indin e mushkërisë, arsye të cilat kanë qenë këto për ndërhyrje kirurgjike. Për momentin që të dy pacientët rezultojnë të jenë në gjendje relativisht stabile sa u përket parametrave vitale dhe ata vazhdojnë që të marrin trajtimin e mëtutjeshëm mjekësor, duke qenë të monitoruar tërë kohën dhe duke qenë të kyçur në aparaturën mjekësore”, ka deklaruar Uka.

Dy të lënduarit e tjerë, një vajzë e mitur dhe një burrë, mjekimin e kanë marrë në Spitalin e Ferizajt.