Gucati: E mbështesim marshin e 12 shtatorit, por s’mund të jemi aty ku ftohet VV-ja

Kryetari i Organizatës së Veteranëve të Luftës Hysni Gucati, u ka bërë thirrje qytetarëve që t’i bashkohen marshit që do të mbahet më 12 shtator, katër ditë para shpalljes së verdiktit final nga Specialja për ish-krerët e UÇK-së. Gucati ka kritikuar organizatorët, që sipas tij, i kanë ftuar kryeministrin në detyrë, Albin Kurtin, dhe deputetët e LVV-së, të cilët, siç tha, i kanë lënë jashtë pagës minimale veteranët e UÇK-së.

Rezana Bozhlani

Organizata e Veteranëve të Luftës së UÇK-së ka dalë në mbështetje të marshit për liri për ish-krerët e UÇK-së që planifikohet të mbahet më 12 shtator.

Kryetari i OVL-UÇK-së, Hysni Gucati, u bëri thirrje veteranëve dhe qytetarëve që të dalin në këtë marsh.

Por ai pati kritika për organizatorët e platformës “Liria ka emër”, që sipas tij i kanë ftuar kryeministrin në detyrë, Albin Kurtin, dhe deputetët e LVV-së, të cilët, siç tha, i kanë lënë jashtë pagës minimale veteranët e UÇK-së.

“Por nuk mund të jemi aty kur ata i bëjnë thirrje Vetëvendosjes, kur ne e dimë se lideri i tyre në Parlamentin e Kosovës e quan kriminel Hashim Thaçin, Kadri Veselin, dhe të tjerët, ku thotë Serbia ka bërë krime, por konsumi thotë këta mbrapa meje janë kriminel ju e keni dëgjuar”, tha Gucati. 
Gucati adresoi kritika ndaj ish-presidentes Vjosa Osmani dhe kryeministrit në detyrë, Albin Kurti, që nuk e kanë ngritur çështjen e ish-krerëve të UÇK-së në qarqe ndërkombëtare.

Edhe Arbëri 5 o. më parë Gucati: E mbështesim “Marshin për liri”, por nuk mund të jemi aty ku ftohet Vetëvendosje

“Takimet më herët që i kemi pasur me Parlamentin Evropian, zviceran, të Shqipërisë, eurodeputetë, Vatikanin, këto është dashur t’i bëjë Qeveria e Kosovës dhe jo ne. Ne kemi marrë barrën dhe kemi bërë këto takime. Kjo barrë prapë na bie neve dhe do t’i ndërmarrim këso takime para vendimit, ku presim një vendim pozitiv dhe presim që të lirohen. Takimet që i kemi pasur në Këshill të Evropës dhe të tjerë, se gjashtë vite asnjë fjalë nuk është ngritur prej Qeverisë së Kosovës. Madje, kur kanë qenë në vizitë në Vatikan, Vjosa Osmani dhe kryeministri ynë, vetë na kanë thënë që s’e kanë ngritur çështjen e Gjykatës Special”, tha Gucati.

Platforma “Liria ka emër”, javën e kaluar prezantoi nismën qytetare “Kosova po pret”, në kuadër të së cilës më 12 shtator do të organizohet “Marshi për liri”, në prag të vendimit të Gjykatës Speciale në Hagë për drejtuesit e Ushtrisë Çlirimtare të Kosovës duke u bërë thirrje të gjithë liderëve politikë dhe institucionalë që t’i bashkohen marshit.