Dështon sërish mbledhja e KGJK-së, mungon vetë kandidati për kryesues

Në mungesë të një anëtari ka dështuar për herë të tretë mbledhja e Këshillit Gjyqësor të Kosovës, ku parashihej të zgjidhej kryesuesi i këtij institucioni. Monitorues të sistemit të drejtësisë e kanë kritikuar dështimin e mbledhjeve duke thënë se nuk janë prezantuar dokumente që tregojnë se anëtarët mungojnë për arsye shëndetësore.

Për të tretën herë rresht ka dështuar të mbahet mbledhja e Këshillit Gjyqësor, që në rend dite ka pasur zgjedhjen e kryesuesit të ri. 

Vetë gjyqtari Besnik Bislimaj, i cili synon pozitën më të lartë në Gjyqësor, nuk ka marrë pjesë në këtë mbledhje, që sipas zëvendëskryesueses së KGJK-së, Arijeta Sadiku, mungoi për arsye shëndetësore. 

“Kemi pranuar një email nga gjyqtari Besnik Bislimaj se ai nuk mund të marrë pjesë në mbledhjen e Këshillit dhe deri më 24 prill për shkaqe shëndetësore nuk mund të marrë pjesë në asnjë aktivitet, andaj edhe mbledhja e sotme nuk mund të mbahet”, ka bërë të ditur Sadiku. 

Kundërkandidat për këtë pozitë, gjyqtari i Gjykatës së Apelit e ka Rrustem Thaqin, që mban pozitën e gjyqtarit në Gjykatën Supreme. 

Dështimin e mbledhjeve të Këshillit Gjyqësor e ka kritikuar hulumtuesi në Institutin e Kosovës për Drejtësi, Flamur Kabashi. 

Edhe Arbëri 20 maj 2026 Kandidatë të vjetër në konkursin e ri për kryesues të KGJK-së

“Me një dështim të njëpasnjëshëm, ku mungon herë njëri anëtar e herë tjetri për arsye shëndetësore, siç është thënë nga ana e tyre. Të paktën është thënë për arsye shëndetësore, por të paktën ne nuk kemi parë dokumente konkrete që tregojnë se mungojnë për arsye shëndetësore dhe kanë arsye përkatëse shëndetësore, cenon besueshmërinë e publikut në këtë institucion”, ka thënë Flamur Kabashi, hulumtues në IKD. 

Kabashi thotë se dështimet e mbledhjeve të Këshillit Gjyqësor bëhen edhe në kohën kur këtij institucioni pritet t’i shtohen edhe anëtarët e tjerë të përzgjedhur nga Kuvendi i Kosovës. 

“Një formë e dështimit të tillë, në kohën kur i kemi në proces përzgjedhjen e tre anëtarëve që vijnë nga Kuvendi, jep me kuptu që po pritet të vijnë tre anëtarë nga Kuvendi i Kosovës dhe pastaj të bëhet zgjedhja e kryesuesit. Pra me njëfarë forme, dështimi i tretë radhazi, në anën tjetër po zhvillohet procesi pranë Kuvendit, mirëpo një qasje e tillë është tërësisht e papranueshme dhe e gabueshme”, është shprehur ai. 

Njëri prej kandidatëve për kryesues të KGJK-së, Rrustem Thaqi, në mbledhjen e kaluar, e cila dështoi për mungesë kuorumi pati thënë se pamundësimi i kuorumit është i qëllimshëm dhe i koordinuar me struktura politike, me qëllim për ta dështuar vendimmarrjen. 

Aktualisht këshilli ka 9 anëtarë, sa është edhe kuorumi. 

Edhe LAJMET E MBRËMJES 30 pri 2026 Rishpallet konkursi për kryesues të KGJK-së, kandidatët u ndan baras

KGJK-ja, sipas Kushtetutës, është e paraparë të ketë 13 anëtarë. Aktualisht ka nëntë, ndërkaq për tre të tjerë po zhvillohet procesi i përzgjedhjes në Kuvendin e Kosovës, kurse për një anëtar nga radhët e gjyqësorit, respektivisht nga Gjykata Supreme, procesi i përzgjedhjes ka marrë rrugët gjyqësore. 
Në mars të këtij viti Këshilli Gjyqësor shpalli konkurs për kryesuesin e ri. 

Kryesues i Këshillit Gjyqësor ka qenë gjykatësi i Supremes, Albert Zogaj, të cilit i ka përfunduar mandati më 9 mars.