Basha shpall Kuvendin të konstituuar pa nënkryetarin serb

“Ne si Kuvend nuk kemi mundësi tjetër se si të vazhdojmë për sa i përket nënkryetarit që vjen nga komunitetit joshumicë serb, prandaj në këtë rast konsideroj se kemi ezauruar edhe pikën e 4 të rendit të ditës të seancës konstituive dhe meqenëse nuk ka mundësi tjetër objektive se si të procedohet tutje, konsideroj se kjo seancë konstituive konsiderohet e përmbyllur”, ka thënë kryetari i Kuvendit, Dimal Basha. PDK dhe LDK, e kanë cilësuar konstituimin e Kuvendit kundërkushtetues

Kryetari i Kuvendit Dimal Basha, e ka shpallur të konstituuar legjislaturën e re dhe e ka përmbyllur seancën konstituive, katër muaj e gjysmë pas hapjes së saj. Në përpjekjen e 60 për konstituim, kryetari Basha e shpalli të funksionalizuar përbërjen e re të Kuvendit pa e zgjedhur nënkryetarin e pestë, që duhet të vije nga radhët e komunitetit serb. Kjo u vlerësua antikushtetuese nga partitë që mandatin e shkuar kanë qenë në opozitë. Thanë se u shkel Kushtetuta dhe Rregullorja e Punës së Kuvendit. Kushtetuta përcakton mënyrën e zgjedhjes së kryetarit dhe të 5 nënkryetarëve e Rregullorja e Punës së Kuvendit, thekson se seanca konstituive konsiderohet e përfunduar me zgjedhjen e Kryetarit dhe nënkryetarëve të Kuvendit.

Në seancën e së shtunës që nisi me 1 orë vonesë, munguan deputetët e Aleancës dhe ata të Nismës. Megjithatë kuorumi qe i mjaftueshëm që ta vazhdohet me votimin e 3 kandidatëve serbë, që kishin mbetur në garë për nënkryetar Kuvendi të cilët do të votoheshin në 6 runde. Paraprakisht kryetari u kërkoi deputetëve t’i japin epilog seancës.

“Në frymën e konstruktivitetit dhe bashkëpunimit le ta kalojmë edhe këtë sfidë së bashku dhe të vazhdojmë me punët e obligimet që na presin, ashtu siç presin prej nesh qytetarët të cilët e kryen obligimin e tyre më 9 shkurt”, u shpreh Basha.

Përmes tërheqjes së shortit, deputetja e Listës Serbe, Miljana Nikoliq doli tri herë në votim, Igor Simiq i kësaj partie dy herë dhe deputeti i Partisë për Liri, Drejtësi dhe Mbijetesë, Nenad Rashiq, njëherë. Asnjëri nuk i mori votat e nevojshme prej 61 sosh.

Për deputetët e Listës Serbe, nuk pati vota për as nga partia. Kundër votoi Vetëvendosje me disa deputetë të pakicave joserbe. PDK-ja abstenoi e LDK-ja nuk mori pjesë në votim. E për deputetin Rashiq, u bënë 56 vota për të Vetëvendosjes bashkë me grupin multi-etnik. PDK-ja abstenoi. E LDK-ja dhe Lista Serbe nuk morën pjesë në votim. Meqë rezultatet e votimit nuk e nxorën asnjë fitues nga 10 deputetët serbë, kryetari Basha vlerësoi se u konsumua rendi i ditës dhe e përmbylli seancën konstituive të nisur më 15 prill.

“Ne si Kuvend nuk kemi mundësi tjetër se si të vazhdojmë për sa i përket nënkryetarit që vjen nga komunitetit joshumicë serb prandaj në këtë rast konsideroj se kemi ezauruar edhe pikën e 4 të rendit të ditës të seancës konstituive dhe meqenëse nuk ka mundësi tjetër objektive se si të procedohet tutje, konsideroj se kjo seancë konstituive konsiderohet e përmbyllur”, deklaruar ai.

Përmbyllja e kësaj seance tha se nënkupton edhe konstituim dhe mungesa e një anëtari të Kryesisë, sipas tij, nuk e bllokon funksionalizimin e Legjislativit.

“Në emër të funksionalizimit të Kuvendit dhe materializimit të rezultatit zgjedhor të 9 shkurtit konsideroj se moszgjedhja e njërit nga pesë nënkryetarët apo njëri nga 6 anëtarët e kryesisë, nuk mund të bëhet pengesë që të bllokojë konsitiuuimin e Kuvendit të Republikës së Kosovës. Pas përmbylljes së seancës konstituive konsideroj që Kuvendi duhet të vazhdojë punën siç parashihet me Kushtetutë”, ka shtuar ai.

Basha ka ftuar mbledhje të kryesisë për të hënën nga ora 13:00, në mënyrë që të konsultohet me nënkryetarët se si do ta vazhdojë punën tutje Kuvendi i Kosovës. Në Partinë Demokratike dhe në Lidhjen Demokratike e kanë refuzuar pjesëmarrjen.

Opozita vlerëson se Basha shkeli Kushtetutën dhe Rregulloren e Kuvendit

Partitë opozitare, PDK dhe LDK, e kanë cilësuar konstituimin e Kuvendit nga Dimal Basha si kundërkushtetues dhe pjesë të lojës politike të kreut të LVV-së, Albin Kurti. Vetëvendosje e ka mbrojtur vendimin, duke e quajtur kushtetues dhe duke theksuar se ishte e domosdoshme të mos lejohej Lista Serbe ta bllokonte procesin, derisa e kanë akuzuar opozitën për pengim të qëllimshëm. Në LVV thonë se situata e re e krijuar ka përpara dy alternativa; ose krijimin e Qeverisë së Vetëvendosjes ose zgjedhjet e reja.

Kreu i PDK-së, Memli Krasniqi u shpreh se nuk mund të ketë konstituim pa u kompletuar kryesia e Kuvendit dhe se kjo situatë sipas tij po shfrytëzohet nga kryetari i Vetëvendosjes Albin Kurti, për ta zvarritur krijimin e institucioneve derisa t’i sigurojë numrat për Qeverinë.

“Kuvendi nuk është konstituuar së paku sipas Kushtetutës së Kosovës jo, e as sipas Rregullores së Punës së Kuvendit. Kështu që është thjeshtë vazhdim i lojës politike të Albin Kurtit , thellimi i krizës politike në të cilën jemi, vazhdimi i hezitimit të tij për të hyrë në afate kushtetuese sepse s’i ka numrat për t’u bërë kryeministër dhe po dëshiron të vazhdojë uzurpimin e zyrës së kryeministrit në mënyrë të paligjshme siç është duke bërë tash e sa kohë”, u shpreh Krasniqi.

Kryetari i LDK-së, Lumir Abdixhiku, përveç Vetëvendosjes, ka kritikuar edhe dy partitë tjera shqiptare që sipas tij, me ndihmën e tyre, Kuvendi udhëhiqet nga një person që shkel Kushtetutën.

“Në këtë pikë shihet edhe naiviteti i partive të tjera, të cilat jo vetëm që po e mbajnë Kuvendin të bllokuar, por edhe na lënë me një kryetar Kuvendi si Dimal Basha, i cili sot jo vetëm që vazhdoi me shkelje të Kushtetutës, por edhe me pretendimin se Kuvendi është konstituuar, pa interpretuar qartë Kushtetutën e Kosovës”, ka deklaruar Abdixhiku.

Por në Vetëvendosje e vlerësojnë tërësisht kushtetuese mënyrën e përmbylljes së seancës dhe konstatimin për konstituim të Kuvendit. Deputeti i LVV-së, Hekuran Murati tha se ka qenë e rëndësishme që të mos lejohet Lista Serbe, e cila e mohon shtetësinë e Kosovës, ta prolongojë konstituimin e Kuvendit, gjë për të cilën e akuzojnë edhe opozitën e deritanishme.

“Ne jemi të interesuar që ta bëjmë Qeverinë dhe institucionet e vendit të vazhdojnë punën. Pra të konstituohet Kuvendi dhe të ecim tutje me Qeverinë. Janë ata që në vazhdimësi duke gjetur pretekste të ndryshme në kundërthënie me atë që kanë vepruar edhe vetë kanë bllokuar dhe janë munduar ta pengojnë edhe përmbylljen e konstituimit të Kuvendit”, ka theksuar Murati.

Por, deputetja e LDK-së, Hykmete Bajrami iu kundërpërgjigj akuzave të Vetëvendosjes, se partitë shqiptare e penguan votimin e një deputeti tjetër serb që nuk është i Listës Serbe.

“Është hipokrizi me dalë para mediave dy eksponentë të Lëvizjes Vetëvendosje dhe të apostrofojnë parti të tjera që kinse ne jemi me Listën Serbe ndërkohë që janë përgjimet e Mimoza Kusarit duke qenë shefe e 58 deputetëve me Listën Serbe dhe me Milan Radojqiqin”, ka thënë Bajrami.

Pas situatës së re politike, nënkryetarja e Kuvendit, Albulena Haxhiu vlerëson se janë dy alternativa, ose krijimi i Qeverisë nga Vetëvendosje ose zgjedhjet e reja.

“Ne nuk guxojmë që të mbesim peng i atyre që e mohojnë ekzistencën tonë si shtet. Pra është jashtëzakonisht e rëndësishme që ne të ecim përpara me kryesinë aktuale pra përveç kryetarit të Kuvendit me nënkryetarët e zgjedhur të Kuvendit të Kosovës pra ne jemi të interesuar që të ecim përpara ose me qeverinë e re ose me zgjedhje sepse nuk kemi asnjë alternativë tjetër”, tha Haxhiu.

Sa i përket votave për ta bërë Qeverinë, në Vetëvendosje thanë se kjo do të shihet në seancën kur do të votohet mandatari dhe kabineti qeveritar.

Lista Serbe ankohet në Gjykatën Kushtetuese

Lista Serbe është ankuar në Gjykatën Kushtetuese se kryetari i Kuvendit Dimal Basha ka bërë shkelje të Kushtetutës me ndarjen e procedurës së votimit për nënkryetarët nga radhët e komuniteteve. Përveç kësaj, në deklarimin e saj publik, Lista Serbe pati bërë të ditur se do të ankohet edhe për tërheqjen e shortit nga kryeparlamentari, procedurë e cila sipas saj qe e jashtëligjshme.

Në prag të takimit të Kuvendit për zgjedhjen e nënkryetarit serb, Lista Serbe njoftoi në Facebook se deputetët e saj dorëzuan të shtunën një ankesë në Gjykatën Kushtetuese “për shkak të shkeljes së rëndë të të drejtave të popullit serb në seancat e kuvendit në Prishtinë”.

“Parimet kushtetuese dhe demokratike janë cenuar rëndë, ndërsa popullit serb i është pamundësuar ushtrimi i të drejtave të tij të garantuara”, thuhet në njoftim.

Ajo tha se pret nga gjykata më e lartët “të reagojë menjëherë dhe të ndërmarrë të gjitha masat e nevojshme për mbrojtjen e sundimit të ligjit, si dhe të drejtave të popullit serb në përputhje me aktet juridike në fuqi”.

Ankesa e kësaj partie erdhi pasi kryetari i porsazgjedhur i Kuvendit, Dimal Basha, i hodhi në votim ndaras nënkryetarët e pakicave dhe më pas përdori shortin për kandidatët për nënkryetarin serb. Ndarja e procedurës së votimit për nënkryetarët e pakicave u bë me kërkesë të grupit multietnik. Pas kësaj me shumicë votash deputetët e kanë zgjedhur Emilja Rexhepin nënkryetare të Kuvendit nga radhët e grupit multietnik. Pas saj, Lista Serbe ka propozuar tri herë kandidatin e saj për nënkryetar Slavko Simiqin, i cili më së shumti mori 10 vota për. Pasi nuk u zgjodh ky kandidat, për tri herë të tjera kryetari i kërkoi LS-së të propozojë një emër tjetër, por kjo parti refuzoi. Duke u bazuar në Rregulloren e Punës së Kuvendit, Basha procedoi me tërheqjen e shortit, të cilën e administroi vetë. Të shtunën u ezauruan të gjithë emrat e deputetëve serbë për nënkryetar Kuvendi dhe nuk u zgjodh asnjë nga ta.