Kontestohet si jokushtetuese procedura për konstituimin e Kuvendit

Mbyllja e seancës konstituive të shtunën pa zgjedhjen edhe të nënkryetarit të pestë nga radhët e komunitetit serb është në kundërshtim me Kushtetutën, ka thënë ish-kryetari i Gjykatës Kushtetuese, Enver Hasani.

Ai, në një përgjigje për KOHËN, thotë se procedura e ndjekur për zgjedhjen e nënkryetarëve nuk është në përputhje as me Kushtetutën dhe as me Rregulloren e Punës të Kuvendit, teksa shton se Gjykata Kushtetuese mund ta anulojë këtë seancë.

“Tërë procedura e ndjekur për zgjedhjen e nënkryetarëve është në kundërshtim me Kushtetutën e Kosovës, Rregulloren e Kuvendit dhe aktgjykimet e Gjykatës Kushtetuese, që nga ndërrimi i rendit të ditës e deri te hedhja e shortit dhe pamundësia e kandidimit të kandidatit serb nga shumica e deputetëve serbë në Kuvendin e Kosovës. Sigurisht që kjo ka pasoja në raport me pozitën ndërkombëtare të Kosovës dhe, mbi të gjitha, flet qartë për shpërfillje të vetëdijshme dhe me qëllim të rendit kushtetues dhe ligjor të Republikës së Kosovës nga kryetari Kuvendit dhe partia që ai përfaqëson”, ka thënë Hasani.

Qëndrim të ngjashëm kanë shprehur edhe në shoqërisë civile.

Eugen Cakolli, hulumtues i lartë në Institutin Demokratik të Kosovës, thotë se rasti i përmbylljes së seancës konstituive duhet të marrë zgjidhje në Gjykata.

“Konstatimet (lexo: “shpikjet”) e fundit të Kryetarit nuk kanë asnjë vlerë juridike. I tërë ky non-sens politik tashmë mund të zgjidhet vetëm nga Gjykata – qoftë me konstatim të dështimit të konstituimit të Kuvendit brenda afatit 30-ditor, ose me shpallje të pavlefshme dhe përsëritje të procedurës së votimit për nënkryetarët e komuniteteve”, ka thënë Cakolli.

Kuvendi nuk ka arritur as të shtunën ta zgjedhë nënkryetarin e pestë nga radhët e komunitetit serb, pasi që asnjëri nga tre kandidatët e mbetur në garë nuk ka marrë vota të mjaftueshme.

Megjithëkëtë, kryetari Dimal Basha ka konstatuar se Kuvendi duhet ta vazhdojë punën, duke e shpallur të mbyllur seancën konstituive. Basha ka thirrur mbledhje të kryesisë për të hënën.