Arrestohet i dyshuari për kanosje të kryeministrit Kurti

Është arrestuar një person i cili dyshohet se para katër ditësh e ka kërcënuar kryeministrin Albin Kurti në rrjete sociale. Sipas informacioneve të ofruara nga policia, në banesën e të dyshuarit është gjetur një pushkë gjuetie pa leje. I dyshuari është dërguar në mbajtje për 48 orë

Policia ka arrestuar një person i cili e ka kërcënuar kryeministrin Albin Kurti nëpërmjet shkrimeve në rrjete sociale.

I arrestuari, kërcënimet i ka bërë në emër të Brigadës së Veriut, organizatë kjo e shpallur terroriste nga Qeveria.

Në njoftimin e policisë thuhet se i dyshuari veprën e ka kryer të martën.

“Përmes rrjeteve sociale është kanosur kryeministri i Republikës së Kosovës, si dhe postime kërcënuese për dhunë në emër të ‘Brigada sever’. Nga veprimet hetimore është identifikuar i dyshuari M.R. (mashkull kosovar, viti i lindjes 2004)”, ka bërë të ditur Policia.

20-vjeçari është marrë në pyetje në prezencë të avokatit, ndërsa gjatë kontrolleve në banesën e tij policia ka gjetur armë pa leje.

Edhe Arbëri 3 sht 2026 Arrestohet personi që dyshohet se e kanosi kryeministrin

“Është gjetur dhe sekuestruar një armë gjuetie pa leje. Pas përfundimit të marrjes së deklaratës, me vendim të prokurorit kujdestar nga Prokuroria Themelore në Mitrovicë, të dyshuarit i caktohet masa e ndalimit policor prej 48 orëve. Hetimet lidhur me rastin do të vazhdojnë nën autorizimin e prokurorit të rastit nga Prokuroria Themelore Mitrovicë”, ka bërë të ditur Policia.

Më 8 gusht të vitit 2023 një person u dënua me 2000 euro gjobë pasi nëpërmjet rrjeteve sociale kishte kërcënuar ish-kryeministrin Avdullah Hoti, i cili është deputet i Lidhjes Demokratike.