Familjarët e të zhdukurve nuk shohin risi në Deklaratën e dakorduar në Bruksel
Foto: Alban Bujari \ KOHA
Pëlqeje KTV Video për të parë video të përzgjedhura nga KOHA
Përfaqësuesit shqiptarë e ata serbë të shoqatave të familjarëve të të zhdukurve kanë shprehur qëndrimin se Deklarata për të Zhdukurit, e dakorduar më 2 maj në Bruksel, nuk përmban zotime të reja për Serbinë e Kosovën. Ata, nëpërmjet një diskutimi për çështjen, të mbajtur në Qendrën Mediale në Çagllavicë, kërkuan që palëve në dialog t’u bëhet presion për zbardhjen e fatit të të zhdukurve
Deklarata e dakorduar në Bruksel për personat e zhdukur nuk përmban zotime të reja për Serbinë dhe Kosovën, thanë të martën përfaqësues shqiptarë e ata serbë të shoqatave të familjarëve të personave të zhdukur me dhunë.
Në një diskutim mbi Deklaratën për Personat e Zhdukur, të mbajtur në Qendrën Mediale në Çagllavicë, ata shprehën zhgënjimin me punën e qeverive, instituteve të mjekësisë ligjore dhe prokurorive në Serbi dhe Kosovë.
Bajram Qerkinaj, udhëheqës i Qendrës Burimore për të Zhdukurit, tha se zotimet e dhëna në Deklaratën e nënshkruar më 2 maj nga kryeministri i Kosovës, Albin Kurti, dhe presidenti i Serbisë, Aleksandar Vuçiq, janë dakorduar edhe më herët nga politikanë të tjerë, teksa kërkoi që institucionet ta trajtojnë çështjen me seriozitet.
“Unë jam i kënaqur që thoni se e keni një shpresë se do të zhbllokohet problemi i personave të pagjetur në takimin në Bruksel, unë mendoj se ai duhet të zhbllokohet, porse është bllokuar edhe më keq se që ka qenë”, ka thënë Qerkinaj.
E Jasmina Zhivkoviq dhe Silvana Marinkoviq, dy përfaqësuese të shoqatave të serbëve të pagjetur të Shtërpcës e Graçanicës, thanë se zbardhja e fatit të të pagjeturve është çështje humanitare, me të cilën megjithëse nuk duhet të bëhet politikë, po bëhen kalkulime politike.
“Procesi nuk duhet të bllokohet dhe ta humbë aspektin humanitar. E, marrë parasysh se po jemi pjesë e marrëveshjeve politike, pjesë e një politike që tregton me interesa, familjarët sinqerisht besojnë që do të vijë një pikë kur do të jetë pjesë e interesit të politikanëve zgjidhja e këtyre çështjeve në mënyrë të drejtë e të duhur. Kjo është e vetmja qasje humane, zgjidhja e fatit të të zhdukurve, të të rrëmbyerve dhe zbardhjes se kush i rrëmbeu dhe ku janë të pagjeturit të cilët po i kërkojnë familjarët e tyre”, deklaroi Zhivkoviq.
Marinkoviq u shpreh se deri më tash ka pasur vetëm premtime.
“E gjitha kjo që është nënshkruar tash më 2 maj është nënshkruar e pajtuar me grupin punues që kryesohej nga Komisioni Ndërkombëtar për të Zhdukurit. Të gjitha janë shqyrtuar e pajtuar e nënshkruar, por s’është respektuar… Me vite e kemi pritur zhgroposjen e varrezave potenciale, e ka vetëm premtime dhe asgjë tjetër”, ka deklaruar Marinkoviq.
Folësit në këtë diskutim u adresuan kërkesë instituteve të mjekësisë ligjore, prokurorive, qeverive e ndërkombëtarëve, përfshirë BE-në, për angazhim më serioz në zbardhjen e fatit të të pagjeturve.
Që nga përfundimi i luftës, familjarë kosovarë janë në pritje të gjetjes së trupave të 1 mijë e 600 të zhdukurve me dhunë, shumica prej të cilëve janë shqiptarë.
