Ka vdekur dirigjenti, kompozitori e akademiku i njohur kroat me origjinë arbëreshe, Pavle Deshpali. Deshpali u lind më 18 qershor të vitit 1934. U rrit në një familje të njohur muzikantësh me vëllain Valter Deshpali, violonçilist i njohur dhe motrën Maja, violiniste dhe mësimet e para në muzikë i mori prej babait të tij, Shime, po ashtu kompozitor i njohur. Studimet për kompozim i kreu në vitin 1960 në klasën e Stjepan Shulekut në Akademinë e Muzikës në Zagreb. Prej vitit 1962 deri më 1967 ka qenë dirigjenti kryesor i Orkestrës Simfonike të Radio Televizionit të Zagrebit e prej vitit 1963, këtë pozitë e ka mbajtur në Orkestrën Kamertale, të RTZ-së përderisa ka qenë edhe dirigjent mysafir i Filharmonisë së Zagrebit. Disa herë ka dirigjuar me Filharmoninë e Kosovës, me të cilën më 2014 ka festuar edhe 80-vjetorin e lindjes.
Prej vitit 1980 deri në vitin 1985 ka qenë dirigjenti kryesor i Filharmonisë së Zagrebit e prej vitit 1987, profesor i dirigjimit në Akademinë e Muzikës në Zagreb. Prej vitit 1988 ka qenë anëtarë i Akademisë së Shkencave të Arteve të Kroacisë.
