Muzeu i Kosovës i parapriu festës me punëtori e aktivitete për të rinj

Muzeu i Kosovës, i parapriu festës së Ditës Ndërkombëtare të Muzeve që në gjithë botën shënohet më 18 Maj.

Duke e prezantuar rolin e muzeve si institucione që i shërbejnë zhvillimit të shoqërisë, në bashkëpunim me degën e Antropologjisë dhe Etnologjisë së Universitetit të Prishtinës, u organizuan punëtori dhe aktivitete për të rinj dhe fëmijë, raporton “Express” i KTV-së.

Punëtoria me temë “Muzetë si Qendra kulturore: E ardhmja e Traditës”, ka për qëllim t’i aftësojë fëmijët që me materialet e ripërdorshme, të krijojnë punime artizanale.

Vjollca Aliu, ushtruese e detyrës së drejtorit të Muzeut të Kosovës, foli për gjendjen aktuale të muzeve.

Në kuadër të aktiviteteve për Ditën e Muzeut, u promovua edhe vëllimi me ilustrime, “Aventura e re e Karlit”, që pasqyron një tregim rreth traditës.

Që nga viti 1977, Këshilli Ndërkombëtar i Muzeve vendosi që 18 maji të jetë Dita Ndërkombëtare e Muzeve, si institucione që hulumtojnë, konservojnë dhe mbledhin eksponatet e trashëgimisë kulturore.