Nga 7 qershori, Drejtimi i Regjisë së Filmit dhe Televizionit i Fakultetit të Arteve në Universitetin e Prishtinës “Hasan Prishtina” në bashkëpunim me Kohavisionin do të sjellin serinë e shfaqjes së filmave studentorë, “Filmi UP”.
Për gjashtë javë rresht do të prezantohen dymbëdhjetë filma nga dymbëdhjetë studentë të Drejtimit të Regjisë.
Dy filmat e parë që do hapin këtë program janë “Horoskopi, grimi dhe dhëmbi që mungon” nga Albana Nila dhe “Engjëjt e kaltër” nga Jon Mithi. Ndërsa në javët në vazhdim do të shfaqen filmat “Shpikësi” nga Arbër Krasniqi, “Rripi i këputur i orës, shija e pepermintit dhe muhabeti me pullë të kuqe” nga Qëndresa Krasniqi, “Djepi” nga Berat Safqiu, “E njelmët” nga Dita Shaqiri, “The lost one” nga Donjeta Hyseni, “Gobleni i spanjollkës me kitarë, unaza e vjedhur dhe frika nga merimangat” nga Indrit Ferati, “Veç kuq” nga Durim Kryeziu, “Mollëkuqja” nga Hana Bucalija, “Faith” nga Jehona Berisha dhe i gjithë rrugëtimi do përmbyllet me filmin “Kandër” nga regjisorja Trëndëlinë Halili.
Dardan Selimaj, producent ekzekutiv në Kohavision, ka thënë se një marrëveshje mes UP-së dhe KTV-së për të shfaqur filmat e studentëve të regjisë së filmit ka ardhur natyrshëm marrë parasysh që KOHA vazhdimisht promovon punën e studentëve të këtij drejtimi, por edhe fushave të tjera të artit.
“Këtë herë edhe zyrtarisht e kemi arritur një marrëveshje bashkëpunimi dhe kemi planifikuar që kjo praktikë të vazhdojë edhe në vitet e ardhshme akademike”, ka thënë Selimaj.
Programi “Filmi UP” do të vijë në ekranin e KTV-së çdo të diel mbrëma nga ora 20:30, derisa bisedat me studentët, përkatësisht regjisorët e këtyre filmave do të zënë vend çdo të premte nga ora 18:00 në kuadër të emisionit “Express”.
