Të dyshuarit për vrasjen e gruas në Llaushë do t’i bëhet ekzaminimi psikiatrik

Gjykata Themelore në Mitrovicë ka vendosur që Skender Qerimajt, personi që dyshohet se vrau bashkëshorten e tij në Llaushë të Skenderajt, t’i bëhet ekzaminimi psikiatrik.

Nga ekzaminimi psikiatrik, Gjykata ka kërkuar të provohet “nëse gjatë kryerjes së veprës penale, i pandehuri ka qenë në gjendje të paaftësisë mendore ose të aftësisë së zvogëluar mendore”.

Ekzaminimi psikiatrik, sipas këtij vendimi të siguruar nga KOHA, duhet të kryhet brenda dy javësh që nga lëshimi i urdhrit.

Skender Qerimaj vrau me armë zjarri gruan e tij më 5 janar në fshatin Llaushë. 51-vjeçari është arrestuar menjëherë pas vrasjes, teksa iu kumtua edhe masa e paraburgimit prej një muaji.

Vrasja e Lirie Qerimajt nxiti reagime të shumta në opinione, pasi ajo e kishte raportuar në Polici rastin e dhunës në familje vetëm disa ditë para vrasjes, mirëpo i dyshuari është lënë i lirë me vendim të prokurores S.K., për të cilën u inicua një procedurë disiplinore. Sipas fëmijëve të çiftit, i dyshuari kishte tentuar edhe një herë tjetër ta privonte nga jeta gruan e tij.