Policia e Kosovës ka njoftuar se në Istog ka arrestuar një person të dyshuar për veprën penale “Mbajtje në pronësi, kontroll ose posedim të paautorizuar të armëve”.
Në njoftimin e Policisë thuhet se stacioni policor në Istog, të dielën rreth orës 09:30, është njoftuar se një person i dyshuar po i ndalon automjetet pa autorizim.
“Njësitet relevante të stacionit policor në Istog kanë shkuar në atë lokacion dhe kanë arrestuar të dyshuarin, i cili ishte agresiv. Lidhur me këtë rast kanë dalë mjekët kompetentë për ta kontrolluar të dyshuarin. Në koordinim me prokurorin e shtetit, në vendin ku i dyshuari kishte qëndruar, gjatë bastisjes, janë gjetur dhe janë sekuestruar 1 armë AK-47, 2 karikatorë të së njëjtës armë dhe 55 fishekë 7.62 mm”, thuhet në njoftim.
Me vendim të prokurorit të shtetit personi i dyshuar thuhet se është ndaluar për 48 orë.
