Një muaj paraburgim për të dyshuarin për trafikim me njerëz në Gjilan

Gjykata Themelore në Gjilan ia ka caktuar masën e paraburgimit prej 30 ditësh të pandehurit V. A., i cili dyshohet për trafikim me njerëz.

Sipas njoftimit të gjykatës të mërkurën, i pandehuri dyshohet se ka trafikuar për qëllime të shfrytëzimit seksual një grua me të meta psikike, në atë mënyrë që e njëjta të ofrojë shërbime seksuale me pagesë.

“Ekziston dyshimi i bazuar se i pandehuri e ka trafikuar për qëllime të shfrytëzimit seksual të dëmtuarën/viktimën, me të meta psikike, në atë mënyrë që e njëjta të ofrojë shërbime seksuale me pagesë personave të ndryshëm. Fillimisht duke e josh për lidhje dashurie me premtimin për martesë dhe pastaj të njëjtën e ka shfrytëzuar duke i siguruar klientë për shërbime seksuale në këmbim të pagesës”, thuhet në njoftim.