Një burrë dënohet me shtatë vjet burgim për grabitje

Një burrë sot në Prishtinë është shpallur fajtor për dy vepra penale, “Grabitje” dhe “Mbajtja në pronësi, kontroll, ose posedim të paautorizuar të armëve”.

Gjykata Themelore në Prishtinë ka bërë të ditur se i akuzuari B.K është dënuar me 7 vjet burgim për veprën penale "Grabitje", ndërsa, për veprën penale “Mbajtja në pronësi, kontroll, ose posedim të paautorizuar të armëve”, është dënuar me 1 mijë euro.

“I akuzuari B.K është shpallur fajtor dhe është dënuar me dënim me burg në kohëzgjatje prej 7 vjetëve për veprën penale në bashkëkryerje, ‘Grabitje’ në të cilin dënim i llogaritet edhe koha e kaluar në paraburgim nga data 04.03.2020 deri me datë 08.12.2022, ndërsa për veprën penale, ‘Mbajtja në pronësi, kontroll, ose posedim të paautorizuar të armëve’, gjykata i shqiptoi dënim gjobë në shumën prej 1000 euro. Sa i përket veprës penale në bashkëkryerje e në vazhdimësi, Grabitje, të njëjtin gjykata e liroi nga akuza, në mungesë të provave. I akuzuari B.K detyrohet që të dëmtuarit S.G t'ia paguajë dëmin në shumë prej 280 euro, pas plotfuqishmërisë së aktgjykimit, ndërsa sa i përket të dëmtuarës ‘Exfis’ e njëjta udhëzohet në kontest të rregullt juridiko civil, i akuzuari po ashtu detyrohet që të paguajë shpenzimet gjyqësore sipas fletë shpenzimit të kësaj gjykate në shumën prej 500 euro, ndërsa në Fondin e viktimave shumën prej 50 euro”, është bërë e ditur në komunikatë.

Me aktvendim të veçantë, siç ka informuar Gjykata, të akuzuarit B.K i vazhdohet masa e paraburgimit deri në plotfuqishmëri të aktgjykimit, por jo më gjatë se dënimi i shqiptuar.