Në Morinë arrestohet shtetasi i Shqipërisë, tentoi të kontrabandonte armë nga Kosova

Policia e Shqipërisë ka njoftuar se ka parandaluar një tentim kontrabande të armëve në pikën kufitare në Morinë.

Siç ka bërë të ditur Policia një shtetas 26-vjeçar i Shqipërisë kishte tentuar t’i kontrabandonte nga Kosova dy pistoleta. Po ashtu gjatë kontrollit në banesën e I.S. u gjet një armë tjetër zjarri, fishekë, si dhe sasi kanabisi.

“Si rezultat i intensifikimit të kontrolleve me përzgjedhje, për shkak të fluksit të qytetarëve në hyrje/dalje, me qëllim parandalimin dhe goditjen e trafiqeve të paligjshme dhe krimeve të tjera kufitare, shërbimet e Policisë Kufitare të Morinës kanë finalizuar operacionin policor të koduar “Transcendence”, si rezultat i të cilit u parandalua dhe u godit një tjetër rast i tentativës për të trafikuar armë zjarri, nga Kosova, drejt Shqipërisë. Në kuadër të këtij operacioni, është kapur në flagrancë dhe është arrestuar nga specialistët për Hetimin e Trafiqeve të Paligjshme dhe Narkotikëve të DVP Kukës, shtetasi I. S., 26 vjeç, banues në Shkodër. Gjatë kontrollit në vijë të dytë, në hyrje të RSh-së, 26-vjeçarit i janë gjetur me vete dhe në çantë, 2 armë zjarri pistoleta, të cilat dyshohet se do të trafikoheshin në vendin tonë. Në vijim të veprimeve procedurale për këtë rast, është koordinuar me Policinë e Shkodrës, ku është ushtruar kontroll në banesën e shtetasit I. S., në Shkodër, ku janë gjetur një tjetër armë zjarri pistoletë, fishekë luftarak, një sasi lënde e dyshuar narkotike cannabis sativa, 400 fara të dyshuara të kësaj bime dhe 2 targa automjeti, të cilat u sekuestruan në cilësinë e provës materiale, së bashku me 2 pistoletat që iu gjetën shtetasit I. S., në PKK Morinë”, ka njoftuar Policia.