Ndalohen dy persona të dyshuar për mashtrim me një pronë në Veternik, iu sekuestrohen para e dokumente false

Prokuroria Themelore në Prishtinë, ka njoftuar se janë ndaluar dy persona M.M dhe Z.J. për 48 orë pas dyshimit se në bashkëpunim edhe me persona të tjerë kanë mashtruar për një pronë të paluajtshme në Veternik.

Gjithashtu bëhet e ditur se nga të dyshuarit janë sekuestruar: 1 veturë në vlerë prej 50 mijë deri në 60 mijë euro; 20 mijë euro të holla; dokumente të ndryshme pronësore të cilat dyshohet se janë të falsifikuara dhe katër telefona celularë të cilët thuhet se do të shërbejnë për hetime të mëtutjeshme.

Për ndalimin e tyre, në njoftim thuhet se është zhvilluar hetim disa mujor në bashkëpunim me Policinë e Kosovës dhe me urdhër të Prokurorit të Shtetit.

“Të njëjtit, dyshohen se në bashkëpunim edhe me persona të tjerë, kanë kryer veprat penale: “Mashtrimi” nga neni 323 i KPRK-së, “Falsifikim i dokumenteve” nga neni 390 i KPRK-së, dhe “Legalizim i përmbajtës së rreme” nga neni 395 i Kodit Penal të Republikës së Kosovës. Rasti ka të bëjë me vepra penale që ndërlidhen me pronën e paluajtshme e cila gjendet në Veternik, me sipërfaqe prej 56 ari”, thuhet në njoftimin e Prokurorisë Themelore në Prishtinë.