Aktakuzë ndaj tre zyrtarëve për “keqpërdorim të detyrës” në Klinë

Prokuroria Themelore në Pejë ka ngritur aktakuzë ndaj tre zyrtarëve të Komunës së Klinës për “keqpërdorim të pozitës apo autoritetit zyrtar”.

Sipas aktakuzës, të pandehurit L.M., në cilësinë e drejtorit të Urbanizmit, dhe A.G., udhëheqës i sektorit të ndërtimit, në dy raste të ndara kanë tejkaluar kompetencat duke lëshuar leje ndërtimore në kundërshtim me ligjin dhe planin rregullues urban.

Ndërsa i pandehuri N.G., inspektor ndërtimi, akuzohet se në tri raste të ndara ka mundësuar ndërtimin e objekteve në kundërshtim me lejet dhe kushtet ndërtimore.

Prokurori i çështjes me rastin e ngritjes se aktakuzës i ka propozuar Gjykatës që të pandehurit të shpallen fajtorë dhe të dënohen sipas ligjit për veprën penale e cila ju vihet në barrë.

E njëjta prokurori, gjatë ditës së mërkurës ka ngritur aktakuzë për veprën e njëjtë edhe ndaj tre zyrtarëve të Komunës së Deçanit.