Sulmuesi i Kosovës, Albion Rrahmani, e ka mbyllur edhe një ndeshje pa shënuar gol. Rrahmani luajti nga fillimi i pjesës së dytë te Sparta Praga që humbi nga FK Pardubice me rezultat 4:2. Kjo ndeshje i takoi xhiros së17-të të elitës së futbollit të Çekisë.
Golin e fundit Rrahmani e kishte shënuar në derbin kundër Slavia Pragës më 5 tetor. Ajo ndeshje ishte mbyllur baras 1:1. Që nga ajo kohë, Rrahmani ka luajtur 13 ndeshje për Sparta Pragën dhe Kosovën. Por në asnjërën prej 13 ndeshjeve që nga 5 tetori nuk ka shënuar gol.
Në 16 ndeshje këtë edicion me fanellën e gjigantit çek, sulmuesi 25-vjeçar ka shënuar gjashtë gola dhe ka asistuar një herë.
Sparta Praga është në vendin e dytë me 34 pikë, kurse liderë është Slavia Praga.
Ndërkohë, Milot Rashica u aktivizua të dielën në minutën e 87-të te Beshiktashi që fitoi 2:0 në udhëtim ndaj Karagumrukut.
Rashica 29-vjeçar nuk ka shënuar ende asnjë gol në Superligën e Turqisë këtë edicion. Ai ka vetëm një asistim.
Beshiktashi është në vendin e pestë me 24 pikë.