UEFA ka nisur hetim për një incident që dyshohet që ka ndodhur gjatë ndeshjes ndërmjet Irlandës dhe Izraelit. Një pjesëtar i stafit irlandez pretendohet se është pështyrë nga një lojtar izraelit.
Incidenti raportohet të ketë ndodhur në tunel, gjatë pushimit mes pjesëve, kur lojtarët dhe pjesëtarët e dy ekipeve po largoheshin nga fusha.
Sipas raportimeve, pjesëtari i stafit të Irlandës, Damien Doyle, është përfshirë në incident dhe ka pretenduar se është pështyrë nga një futbollist i Izraelit.
Federata izraelite e futbollit i ka mohuar këto pretendime.
UEFA ka caktuar inspektor të Etikës dhe Disiplinës për të shqyrtuar raportet lidhur me rastin. Pas përfundimit të hetimit, organet përkatëse të UEFA-s do të vendosin nëse ka pasur shkelje të rregulloreve disiplinore dhe nëse do të merren masa.
Ndeshja, e zhvilluar në Serbi, përfundoi me rezultatin 1:1.
