Përzgjedhësi Franco Foda e ka publikuar listën e lojtarëve që do të jenë të gatshëm për Kosovën për dy ndeshjet e muajit nëntor.
Në listën e përzgjedhësit gjerman janë ftuar 27 futbollistë. Ka edhe emra të rinj.
Për herë të parë te Kosova është ftuar mbrojtësi 27-vjeçar Lindrit Kamberi, që është kapiten i Zurichut.
Është ftuar për herë të parë edhe qendërmbrojtësi i Malmos, Bleon Kurtulus. Bleoni është vëllai i vogël i Edvin Kurtulusit, që më herët ishte kapiten i U21 të Kosovës dhe vendosi ta përfaqësonte Suedinë në nivelin e të rriturve. Bleoni ka luajtur për të gjitha grupmoshat e Suedisë, U16, U17, U18 dhe U21. Tani ka vendosur ta përfaqësojë Kosovën.
Është ftuar për herën e parë edhe sulmuesi Enis Rexhepi. Rexhepi është qendërsulmues 18-vjeçar, që ka shkëlqyer së fundmi për të rinjtë e Stuttgartit gjerman.
Kosova më 14 nëntor e pret Izraelin në Prishtinë, ndërsa e mbyll kampanjën e pestë të Ligës së Kombeve më 17 nëntor në Dublin ndaj Irlandës.
Pas katër ndeshjeve të luajtura në fund të shtatorit dhe fillim të tetorit, Kosova zë vendin e dytë me pesë pikë, sa ka edhe Irlanda në vendin e tretë. Izraeli është i fundit, me dy pikë.
Edhe
Austria me ndryshime për ndeshjet e fundit të Ligës së Kombeve
Grupit B3 të Ligës së Kombeve i prin Austria me tetë pikë.
Kosova e mposhti Irlandën në ndeshjen e parë 1:0. Më pas humbi 3:1 nga Austria, ndërsa në dy ballafaqimet e fundit barazoi pa gola me Izraelin dhe 1:1 me Austrinë.
Grumbullimi i Kosovës nis të hënën, ndërsa nga ora 12:00 do të mbahet konferenca për media.
