Nëse historia e 36-vjeçarit Josip Iliçiq nuk do të ishte e vërtetë, ajo do të mund të tregohej si përrallë.
Për katër vjet sulmuesi slloven u sfidua nga e keqja, që në rastin e tij ishte depresioni. Javët e fundit kanë dëshmuar se e mira dhe Iliçiqi kanë triumfuar.
Krejtësisht papritur, Iliçiq fillimisht u përfshi në skuadrën e zgjeruar të Sllovenisë për Kampionatin Evropian të futbollit. Dhe më pas të martën mbrëma ai shënoi gol në ndeshjen miqësore ndaj Armenisë. Ishte ndeshja e tij e parë ndërkombëtare pas gati tri vjetësh.
“Profesori”, siç e quanin dikur tifozët e Atalantas, është rikthyer. Më në fund.
Periudha e gjatë e vuajtjeve të Iliçiqit nisi me shfaqjen e koronavirusit. Kur virusi u shfaq së pari, në vitin 2020, ai ishte në kulmin e karrierës. Katër golat e tij në fitoren 4:3 ndaj Valencias mbahen mend ende.
Edhe
Iliçiq përfshihet te Sllovenia
Ishte marsi i vitit 2020 dhe ndeshja e Ligës së Kampionëve.
Pas asaj ndeshjeje asgjë nuk ishte si më parë. Bergamo ishte epiqendër e epidemisë. I izoluar nga familja e tij në Slloveni, Iliçiqi pa se si kamionët e ushtrisë po bartnin kufomat jashtë qytetit. Kjo hapi plagë të vjetra te Iliçiqi. Ktheu në kujtesë kohën kur ai dhe familja e tij u larguan nga Bosnja në Slloveni për shkak të luftës.
Iliçiqi ra në depresion. Kur kufijtë u hapën për herë të parë në verën e vitit 2020, ai shkoi drejt e në shtëpi për trajtim psikologjik. Kjo i shërbeu aq shumë sa që ishte në gjendje të bënte fillim të ri në vjeshtë të atij viti. Dukej mirë. Por ky ishte vetëm një perceptim i jashtëm. Ai humbi interesimin për futbollin. Një vit më pas, depresioni iu kthye.
Gjërat u bënë sërish të zeza në jetën e Iliçiqit dhe ai u zhduk nga skena dhe nga fushat e futbollit. Këtë herë dukej për periudhë më të gjatë. Ai u kthye në Slloveni. E ndërpreu karrierën, humbi formën fizike dhe u dorëzua mentalisht. E ndërpreu kontratën me Atalantan me marrëveshje të dyanshme.
Vetëm më pas 36-vjeçari nisi të kthehet, hap pas hapi. Në vjeshtën e vitit 2022, Maribori, klubi i tij në moshë të re, i ofroi mundësinë që të fillojë të luajë futboll sërish. Ai firmosi, por nuk u ngut për asgjë.
Vetëm në edicionin e fundit nisi të luajë rregullisht. Dhe ishte aq impresiv, me tetë gola e 11 asistime, saqë selektori Matjazh Kek me shumë mundësi do ta marrë në Evropian.
Edhe
Allegri tregon se po punohet në shëndetin mendor të lojtarëve
Ai gjithnjë ka ëndërruar të luajë në një turne të madh me Slloveninë. Duket që ëndrra e tij më në fund po realizohet.
