Në 29 paraqitje kampionale në edicionin e kaluar në La Liga, Vedat Muriqi i kishte shtatë gola e dy asistime për Mallorcan. Shtatë gola, dy asistime e 29 paraqitje i kishte për Mallorcan në kampionatin spanjoll edhe në edicionin 2023/2024.
Në edicionin aktual e ka kaluar shifrën e shtatë golave për vetëm 13 ndeshje. Sulmuesi i Kosovës tani i ka tetë gola në 13 paraqitje në elitën spanjolle. Me ritmin aktual ky mund të jetë edicioni më i mirë i Muriqit te Mallorca, por edhe në karrierë, nëse për bazë merret fakti që golat në Spanjë kanë koeficient më të lartë vlerësimi se golat në Turqi.
Në edicionin 2022/2023, prizrenasi i kishte 15 gola e tri asistime në 35 paraqitje në La Liga. Kjo shifër golash tashmë duket lehtë e kalueshme. 15 gola në një edicion i kishte edhe te Fenerbahçe në Turqi, ndërsa 17 i kishte shënuar te Rizespori po në Superligën turke dhe te Giresunspori në kategorinë e dytë turke.
Kur bëhet ranglista e golashënuesve më të mirë në Evropë, goli në La Liga shumëzohet me dy, ndërsa goli në elitën turke shumëzohet me një e gjysmë. Kështu që goli në La Liga është dukshëm më i vlefshëm se në Turqi. Dhe rrjedhimisht Muriqi po lëviz drejt kampionatit më të mirë në karrierë.
31-vjeçari i shënoi dy gola të shtunën në barazimin 2:2 të Mallorcas me Osasunan. Me golat e Muriqit, Mallorca kaloi në avantazh 2:0. Por Osasuna u kthye dhe barazoi në 2:2 në minutat e fundit.
Muriqi ka folur për ndjenjë gëzimi dhe dëshpërimi pas ndeshjes.
“Kemi shënuar dy gola për katër minuta ndaj ekipit shumë defanziv të Osasunas. E kam ndier këtë dhe ekipi e ka ndier po ashtu. Do të analizojmë gabimet tona dhe do të lëvizim përpara”, ka thënë Muriqi për faqen zyrtare të Mallorcas.
Ai ka shprehur keqardhje që golat e shënuar nuk sollën fitoren. Më 9 nëntor, Muriqi shënoi golin e fitores 1:0 ndaj Getafes. Kishte shënuar edhe në fitoren 3:1 ndaj Sevillas më 18 tetor. Kgol tjetër kishte në barazimin 1:1 me Atletico Madridin më 21 shtator, kurse dy i shënoi në humbjen 3:2 nga Espanyoli më 15 shtator. “Llogarinë” për këtë edicion e hapi me golin ndaj Real Madridit, në humbjen 2:1 më 30 gusht.
“Deri në minutën e 82-të është dukur që po luajmë mirë. Kundërshtarët vetëm janë munduar të harkojnë topin. Ata shënuan nga goditja e dënimit për 2:1 dhe më pas filluan të na bëjnë presion. Është dashur të mbajmë topin dhe të luajmë më shumë me të. Është dukur sikur kishim një lojtar më pak në fushë”, ka thënë Muriqi për ndeshjen e së shtunës ndaj Osasunas.
Ai ndihet mirë për golat, por jo plotësisht i plotësuar për shkak të rezultatit. Kishte ndjenjën se nuk po bënte mjaftueshëm, ndonëse po fitonin 2:0.
“Nuk po ankohem, golat janë të rëndësishëm për sulmuesit. Vlerësohem për golat e mirë, por siç e pamë, na duhet shumë më tepër”, ka thënë Muriqi.
Trajneri Jagoba Arrasate ka vlerësuar lojën në sulm, ndërsa ka shprehur keqardhje që skuadra nuk përfitoi nga golat e shënuar.
“Sulmuesit po japin gola dhe po bëjnë që prezenca e tyre të ndihet. Ky është lajm i mirë, por është është mëkat që nuk po e kapitalizojmë lojën e mirë që e kanë bërë sulmuesit”, ka thënë Arrasate.