Futbollisti që ka një paraqitje me Kosovën në miqësoren ndaj Norvegjisë në vitin e kaluar, Art Smakaj, do të luajë në elitën e futbollit austriak në edicionin e ardhshëm.
Mesfushori defensiv, 22-vjeçari Smakaj është prezantuar të premten nga LASK-u.
Ai u transferua në Bundesligën e Autrisë nga Lokomotiva e Zagrebit.
Smakaj ka nënshkruar kontratë deri në verën e vitit 2028.
Smakaj ka luajtur në 81 ndeshje për Lokomotivën, ndërsa debutoi në futbollin profesionist në shkurt të vitit 2022 si 19-vjeçar.
22-vjeçari që ka paraqitje edhe me grupmoshën U21 dhe U19 të Kosovës, është vlerësuar lartë nga trajneri i LASK-ut, Joao Sacramento.
“Art Smakaj është pikërisht profili i lojtarit për të cilin jemi interesuar. Ai është i ri, dinamik, sjell energji dhe pasion, merr përgjegjësi dhe dëshiron ta ketë topin në kontroll. Që nga biseda e parë, e kemi ditur se ai është lojtar me personalitet, brenda dhe jashtë fushës. E kemi bindur dhe ai do të sjellë kualitete të tjera në skuadrën tonë”, ka deklaruar trajneri Sacramento.
Sipas faqes “transfermarkt”, transferimi i Smakajt është bërë për 700 mijë euro.
Te LASK-u paraqitet edhe mesfushori tjetër i Kosovës, Valon Berisha.
