Nuk kishte kohë për festë te kuqezinjtë. Kombëtarja e Shqipërisë në futboll menjëherë të dielën i është kthyer punës për ndeshjen e dytë të edicionit të ri të Ligës së Kombeve të UEFA-s.
Të martën nga ora 20:45 në “Air Albania” në Tiranë, Shqipëria luan ndaj Gjeorgjisë. Shqipëria e Gjeorgjia i kanë fituar ndeshjet e para në Grupin 1 të Ligës B, që është niveli i dytë i Ligës së Kombeve. Shqipëria fitoi 2:1 ndaj Ukrainës në Pragë, në praninë e 15 mijë shikuesve.
Ndërkohë Gjeorgjia mposhti Çekinë në Tbilisi me rezultat të thellë, 4:1. Kështu, ndeshja e së martës do të jetë për vendin e parë në Grupin C1.
Stadiumi në Tiranë do të jetë i mbushur me shikues. Entuziazmi për Kombëtaren e Shqipërisë vazhdon të jetë i madh, sidomos pas fitores në Pragë ndaj Ukrainës.
“Të gjitha biletat për ndeshjen Shqipëri – Gjeorgji, e vlefshme për UEFA Nations League, janë shitur. Federata Shqiptare e Futbollit dëshiron t’i falënderojë të gjithë tifozët shqiptarë që do të jenë të pranishëm në stadiumin ‘Air Albania’ më 10 shtator, në mbështetje të ekipit tonë kombëtar dhe i fton të krijojnë atmosferë të ngrohtë, pozitive dhe të tregojnë respekt ndaj ekipit kundërshtar”, ka shkruar FSHF-ja të dielën.
Shqipëria synon tjetër fitore të martën, por ndeshja me gjeorgjianët vlerësohet e vështirë.
Ndaj Ukrainës, Shqipëria shkëlqeu. Krijoi raste të shumta, ndërsa fitoren e siguroi me golat e Ardian Ismajlit dhe Jasir Asanit. Ismajli u shqua edhe në mbrojtje dhe u vlerësua më i miri. Rey Manaj kishte po ashtu ndeshje shumë pozitive.
Te Shqipëria munguan kapiteni Berat Gjimshiti e po ashtu Armando Broja e Arlind Ajeti. Por mungesat nuk u vërejtën. Të tjerët që fituan rastin nga Sylvinho shfaqën lojë të madhe.
Lojtarët e Shqipërisë edhe të dielën kanë ushtruar në Pragë, përkatësisht në qendrën stërvitore të Spartas.
“Në seancën stërvitore lojtarët që u aktivizuan titullarë me Ukrainën zhvilluan vetëm disa ushtrime fizike dhe pa top, ndërsa futbollistët që nuk u aktivizuan apo hynë në fushë si zëvendësues bënë stërvitje më të ngarkuar dhe taktike”, ka njoftuar FSHF-ja.
Kuqezinjtë po të dielën udhëtuan për në Tiranë, ndërsa të hënën i kompletojnë përgatitjet për ndeshjen sfiduese me gjeorgjianët e papërshtatshëm. Gjeorgjia, njëjtë si Shqipëria, luajti në “Euro 2024” në Gjermani.
