Napoli e filloi me fitore mbrojtjen e titullit në Serie A.
Napolitanët në ndeshjen hapëse të edicionit 2025/26 e mposhtën 2:0 Sassuolon në udhëtim. Në fitoren e Napolit me gol debutoi mesfushori belg, Kevin De Bruyne.
Klubi që për trajner e ka Antonio Conten, të shtunën synon të shënojë fitore edhe ndaj Cagliarit.
Ndeshja Napoli – Cagliari fillon nga ora 20:45 dhe i takon javës së dytë të kampionatit italian.
Napoli është i pamposhtur në 13 ndeshjet e fundit në elitën italiane të futbollit.
Skuadra ku luan edhe kapiteni i Kosovës, Amir Rrahmani, e ka humbur vetëm një nga 28 ndeshjet e fundit ndaj Cagliarit.
Cagliari në xhiron e parë barazoi 1:1 në shtëpi me Fiorentinan.
Të shtunën do të luhen edhe tri ballafaqime tjera.
Nga ora 20:45 takohet Pisa me Romën. Roma në xhiron e parë e mposhti në shtëpi Bolognan me rezultatin 1:0. Ndërsa Pisa e ndali në barazim 1:1 Atalantan.
Romën nga ky edicion po e drejton tekniku italian, Gian Piero Gasperini.
Ndërkohë të dielën nga ora 18:30, Juventusi luan në udhëtim te Genoa.
Edhe “Zonja e vjetër” e filloi edicionin me fitore, duke e mposhtur në shtëpi Parman.
Nënkampioni italian, Interi, nga ora 20:45 po ashtu të dielën e pret Udinesen. Interi në ndeshjen hapëse e mposhti shumë thellë Torinon me rezultatin 5:0. Nga ora 20:45, luan edhe Lazio ndaj Veronas.