Jamal Musiala ka kolapsuar në fushë në miqësoren që Bayern Munichu e ka luajtur ndaj Leipzigut të shtunën. Bavarezët fituan me rezultatin 3:1 në ndeshjen ku shënoi edhe Brajan Gruda, por rezultati mbeti në plan të dytë.
Ka qenë bashkëlojtari i Musialas, marokeni Ismael Saibari, ai i cili e pa situatën dhe vrapoi shpejtë për ta kapur talentin gjerman, para se ai të binte në tokë.
Kjo dyshe bashkëveproi kur u shënua goli i tretë pikërisht nga Musiala, në minutën e 81-të.
Ngjarja frikësuese në “Allianz Arena” ndodhi vetëm dy minuta më vonë.
Temperaturat ishin të larta, deri në 33 gradë Celsius.
Nga pamjet e publikuara u pa që Musiala dukej i çorientuar dhe i hutuar, teksa ishte në pritje të nisjes së ndeshjes pas golit të shënuar.
Musiala already looked unwell shortly before the incident pic.twitter.com/0h19Un7ykt
— - (@MusialaEra) August 15, 2026
Vetëm pak çaste më vonë, ai nuk arriti të qëndronte në këmbët e veta dhe u shtri përtokë, me ndihmën e Saibarit dhe Joshua Kimmichut.
Stafi mjekësor ka vrapuar në fushë, ndërsa tifozët në stadium ishin të habitur dhe në pritje.
23-vjeçari pasi e mori ndihmën e parë, u zëvendësua dhe ai u përcoll jashtë fushës me duartrokitje.
Pati edhe çlirim te tifozët, pasi stafi mjekësor dha shenjën se gjithçka është në rregull me të. Musiala u largua nga fusha, ndërsa tifozët thirrën emrin e tij.
Tifozët e Bayernit tani janë në pritje të lajmit për Musialan nëse ai do të jetë në gjendje të mirë shëndetësore për ta nisur kampanjën e re. Musiala ishte i pafat edhe në prag të nisjes së sezonit të kaluar, kur e theu këmbën.
Ai lëndim e mbajti atë jashtë fushës për më shumë se gjashtë muaj dhe e la me vetëm 15 paraqitje në ligë në edicionin e kaluar.
Luis Diaz shënoi për epërsinë 1:0 të Bayernit në minutën e 13-të, ndërsa Gruda, mesfushori shqiptar me tipare sulmuese, realizoi gol shumë të bukur në minutën e 52-të për 1:1.
Nathaniel Broën shënoi për 2:1 në minutën e 57-të, ndërsa Musiala realizoi më pas për 3:1.
Bavarezët do ta kenë edhe një miqësore me Heidenheimin më 18 gusht, para Superkupës së Gjermanisë ndaj Dortmundit më 22 gusht.
Bayern Munichu e nis Bundesligën me ndeshjen ndaj Stuttgartit më 28 gusht, kurse Leipzigu përballet me Borussia Monchengladbachun.
Drejtori sportiv i Bayernit flet për gjendjen e Musialas
Drejtori sportiv i Bayern Munichut, Max Eberl, ka folur pas ndeshjes për gjendjen shëndetësore të Jamal Musialas, që kolapsoi në fushë në minutën e 83-të.
Eberl ka dhënë lajme pozitive.
“Ai është mirë, kjo është gjëja më e rëndësishme”, ka thënë Eberl pas ndeshjes, shkruan “Bild”.