-
Nga:
BBC
- 15 nëntor 2026 19:33
- Shpërndaje në:
Një shërbim jetik amerikan i internetit satelitor vazhdon të funksionojë me një ngadalësi tepër të madhe, duke ndikuar në aftësinë e Ukrainës për të ndaluar sulmet ruse, ka deklaruar presidenti ukrainas Volodymyr Zelensky.
“Ne shpresojmë që këto kufizime të hiqen. Mbrojtja e jetëve të njerëzve dhe e infrastrukturës energjetike të Ukrainës përpara dimrit varet drejtpërdrejt nga kjo”, tha ai.
Çështja e kufizimeve të shpejtësisë së sistemit Starshield, një shërbim ushtarak i nivelit të lartë, në pronësi të Elon Muskut i cili i është ofruar Ukrainës nga qeveria amerikane, ka qenë objekt diskutimesh prej disa javësh.
Zelensky tha se u kishte kërkuar zyrtarëve që të “bashkëpunojnë sa më ngushtë të jetë e mundur” me qeverinë amerikane dhe kompaninë e Muskut.
“Është e rëndësishme të jemi në anën e duhur të historisë”, u shpreh ai.
Ukraina përdor shërbimin e zakonshëm Starlink për komunikimet në fushën e betejës, ndërsa Starshield përdoret për përgjimin e raketave dhe dronëve në hapësirën ajrore të Ukrainës.
Problemi me kufizimet e shpejtësisë u identifikua për herë të parë në tetor. Kjo çoi në deklarata kontradiktore nga Elon Musk dhe presidenti amerikan Donald Trump.
Musk tha se përgjegjësia i takonte qeverisë amerikane, pasi Starshield kontrollohej prej saj. Por Trumpi e mohoi përgjegjësinë dhe tha se i kishte kërkuar miliarderit që ta “rikthente në funksionim”.