I jashtëzakonshmi Kane e dërgon Anglinë tutje
Harry Kane e ka udhëhequr Anglinë drejt kalimit në 1/8 e finales së Kupës së Botës. Kapiteni Kane i shënoi dy golat e fitores 2:1 të Anglisë ndaj Kongos, të mërkurën mbrëma në Atlanta.
Dy golat e fitores në 1/16 e finales, Kane i realizoi në pjesën e dytë. Tani në raundin tjetër të garës, Anglinë e pret Meksika.
“Tre Luanët” u befasuan në minutën e shtatë, me golin që e shënoi Brian Cipenga.
Anglia provoi shumë në tërë pjesën e parë dhe nisi furishëm edhe në pjesën e dytë.
Por, golin e barazimit e realizoi vetëm në minutën e 75-të.
Kane shënoi për 1:1 me kokë nga afërsia, me asistim të Anthony Gordonit. Gordoni ishte asistues edhe në golin e dytë për kapitenin Kane, që realizoi gol shumë të bukur me gjuajtje të fuqishme.
Sulmuesi i Bayern Munichut tani i ka 13 gola në turne të Kupës së Botës. Pesë prej tyre i ka realizuar në Botërorin 2026, që po organizohet në Kanada, Meksikë dhe SHBA.
Ndeshjen ndaj Meksikës, Anglia e luan më 5 korrik.
Anglia përmbys rezultatin, Kane shënon sërish
Harry Kane e ka shënuar edhe golin e dytë për Anglinë që është duke fituar 2:1 ndaj Kongos.
Kane realizoi për 2:1 në minutën e 86-të.
Goooool, Anglia barazon rezultatin
Harry Kane e ka shënuar golin e katërt për Anglinë në Kupën e Botës.
Anthony Gordon asistoi, ndërsa Kane realizoi me kokë në minutën e 75-të.
Shumë raste por Anglia ende pa gol
Disa futbollistë të Anglisë patën mundësi shënimi në dhjetë minutat e para të pjesës së dytë.
Por “Tre Luanët” ende nuk kanë shënuar.
Jude Bellingham e Marcus Rashford patën mundësitë më të mira, por pa sukses.
Mpasi-Nzau i jashtëzakonshëm, Kongo me epërsi në pjesën e parë
Mpasi-Nzau ka qenë i jashtëzakonshëm te Kongo në portë dhe ka ndalur disa tentime të futbollistëve anglezë.
Dhe Kongo ka shkuar në pushim me epërsi 1:0 ndaj Anglisë.
Brian Cipenga e shënoi golin e minutës së shtatë dhe rezultati nuk ndryshoi, ndonëse “Tre Luanët” provuan shumë.
Jude Bellingham, Harry Kane dhe Marcus Rashford patën disa mundësi të arta shënimi. Por ishte portieri i Le Havres që i ndali tentimet e tyre.
Portieri i Kongos, meritor për rezultatin ndaj Anglisë
Portieri Mpasi-Nzau ka bërë mrekulli në pjesën e parë në ndeshjen ndaj Anglisë.
I pati disa pritje vendimtare.
Në minutën e dytë të shtesës në pjesën e parë, e ndali sërish Jude Bellinghamin.
Bellingham tentoi me kokë, por portieri i Le Havres ishte i saktë në ndërhyrje.
Kongo i afrohet golit, qëllon shtyllën
Kongo i është afruar golit të dytë në ndeshjen ndaj Anglisë. Yoane Wissa ka qëlluar shtyllën në minutën e 42-të.
Nga ana tjetër, Harry Kane ka kërkuar penallti. Gjyqtari e vlerësoi simulim.
Anglia rrit intensitetin e lojës por nuk shënon
Anglia nuk ka shënuar as në minutën e 35-të të ndeshjes, ndonëse e ka rritur shumë intensitetin e lojës për ta barazuar rezultatin ndaj Kongos. “Tre Luanët” patën dy raste të njëpasnjëshme.
Harry Kane fillimisht tentoi por nuk realizoi, e më pas edhe Marcus Rashford gjuajti por nuk e dërgoi topin në rrjetë.
Bellingham i afrohet shënimit të golit
Një gjuajtje e përkryer e Jude Bellinghamit pas gjysmë ore lojë, është pritur me shumë mund nga portieri i Kongos, Lionel Mpasi-Nzau.
Mpasi-Nzau nuk e lejoi mesfushorin e Real Madridit që t’i barazojë shifrat.
Kongo vazhdon të jetë në epërsi 1:0.
Befasi në Atlanta, RD Kongo shokon Anglinë
Kongo ka shënuar gol ndaj Anglisë dhe ka shkaktuar befasi që në nisje të ndeshjes.
Në minutën e shtatë të ndeshjes gol shënoi mesfushori Brian Cipenga.
Tri ndryshime në formacion tek Anglia për duelin ndaj Kongos
Përzgjedhësi Thomas Tuchel ka bërë tri ndryshime tek Anglia për ndeshjen ndaj Kongos, që i takon 1/16 së finales së Kupës së Botës dhe nis në orën 18:00, në “Atlanta Stadium”.
Në ndeshjen e kaluar, Anglia fitoi 2:0 ndaj Panamasë.
Për ndeshjen ndaj Kongos në formacion janë kthyer Djed Spence, Declan Rice dhe Noni Madueke.
Jarrell Quansah është i lënduar, ndërsa Morgan Rogers dhe Bukayo Saka, janë në bankën rezervë.
Formacioni i Anglisë:
Pickford, Spence, Konsa, Guehi, O’Reilly, Anderson, Madueke, Bellingham, Rashford, Kane
Ndërkohë, përzgjedhësi Sebastian Desabre e ka bërë një ndryshim në formacion te përfaqësuesja e Kongos, nga formacioni titulluar ndaj Uzbekistanit.
Ngal’ayel Mukau është titullar në vend të Cedric Bakambus.
Formacioni i Kongos:
Mpasi, Masuaku, Tuanzebe, Mbemba, Wan-Bissaka, Sadiki, Moutoussamy, Mukau, Cipenga, Wissa, Mbuku
