Ministri i Mbrojtjes i Malit, Sadio Camara, është vrarë në një sulm në rezidencën e tij pranë kryeqytetit Bamako, kanë njoftuar familjarët e tij.
Shumë media raportuan vdekjen e Sadio Camara, si pjesë e një vale sulmesh të koordinuara nga militantë xhihadistë dhe separatistë të kryera në të gjithë vendin, transmeton “BBC”. Raportohet se Camara u vra në shpërthimin e një bombe që ishte vendosur në një kamion.
Nuk ka pasur konfirmim nga junta ushtarake, por raportime të mëtejshme thonë se kreu i saj, gjenerali Assimi Goita, u zhvendos në një vend të sigurt pasi shtëpia e tij u vu në shënjestër.
Ndërkohë më në veri, mercenarët rusë të punësuar nga ushtria e Malit ranë dakord të tërhiqen nga Kidal pas dy ditësh përleshjesh, tha grupi separatist Fronti i Çlirimit të Azawadit (FLA).
Për vite me radhë, Mali është përballur me kryengritje nga grupe të lidhura me al-Qaedan dhe grupin e Shtetit Islamik, si dhe nga FLA.
Edhe
Grupe të armatosura nisin sulme të koordinuara në të gjithë Malin
Duke cituar familjen e Camaras dhe mediat franceze, agjencitë e lajmeve thanë se sulmi – i nisur nga militantë të lidhur me al-Qaedan në Kati të shtunën – vrau gjithashtu të paktën tre anëtarë të familjes së Camaras.
Luftimet të shtunën u raportuan në qytetin Kati, një bazë e madhe ushtarake jashtë kryeqytetit, në Gao dhe Kidal në veri, si dhe në qytetet qendrore Sevare dhe Mopti.
