-
Përktheu:
Flutura Gashi-Mehmeti
- 18 shkurt 2026 11:04
- Shpërndaje në:
Vatikani nuk do të marrë pjesë në nismën e ashtuquajtur “Bordi i Paqes” të presidentit amerikan Donald Trump, ka thënë të martën Kardinali Pietro Parolin, zyrtari më i lartë diplomatik i Vatikanit, duke shtuar se përpjekjet për menaxhimin e situatave të krizës duhet të drejtohen nga Kombet e Bashkuara.
“Selia e Shenjtë nuk do të marrë pjesë në Bordin e Paqes për shkak të natyrës së tij të veçantë, e cila qartazi nuk është ajo e shteteve të tjera”, ka thënë Parolin.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“Një shqetësim”, ka shtuar ai, “është që në nivel ndërkombëtar duhet mbi të gjitha të jetë OKB-ja që menaxhon këto situata krize”.
Papa Leoni XIV, papa i parë amerikan dhe kritik i disa politikave të Trumpit, ishte ftuar në janar për t’iu bashkuar bordit.
Sipas planit të Trumpit për Gazën, që çoi në një armëpushim të brishtë në tetor, bordi do të mbikëqyrë qeverisjen e përkohshme të Gazës. Më pas, Trumpi ka thënë se bordi, me të si kryetar, do të zgjerohej për të trajtuar konfliktet globale.
Takimi i parë i bordit do të mbahet të enjten në Uashington për të diskutuar rindërtimin e Gazës.
Italia dhe Bashkimi Evropian kanë thënë se përfaqësuesit e tyre planifikojnë të marrin pjesë vetëm si vëzhgues, pasi nuk janë bashkuar zyrtarisht me bordin.
Shumë ekspertë të të drejtave të njeriut thonë se fakti që Trumpi do të drejtojë një bord për të mbikëqyrur çështjet e një territori të huaj i ngjan një strukture koloniale. Bordi, i themeluar muajin e kaluar, është kritikuar gjithashtu për mungesën e një përfaqësuesi palestinez.
Vendet kanë reaguar me kujdes ndaj ftesës së Trumpit, ndërsa ekspertët shprehin shqetësim se bordi mund të minojë rolin e OKB-së. Disa aleatë të Uashingtonit në Lindjen e Mesme janë bashkuar, por aleatët perëndimorë nuk e kanë bërë këtë deri më tani.
Armëpushimi në Gazë është shkelur vazhdimisht, me qindra palestinezë dhe katër ushtarë izraelitë të raportuar të vrarë që nga fillimi i tij në tetor.
Ofensiva e Izraelit në Gazë ka shkaktuar mbi 72,000 viktima, ka sjellë krizë urie dhe ka zhvendosur brenda territorit të gjithë popullsinë e Gazës.
Shumë ekspertë të të drejtave të njeriut, studiues dhe një hetim i OKB-së thonë se situata përbën gjenocid. Izraeli i quan veprimet e tij vetëmbrojtje, pasi militantë të udhëhequr nga Hamas vranë 1,200 persona dhe morën mbi 250 pengje në një sulm në fund të vitit 2023.
Papa Leoni ka dënuar vazhdimisht kushtet në Gazë. Papa, udhëheqësi i 1.4 miliardë katolikëve në botë, rrallë merr pjesë në borde ndërkombëtare.
Vatikani ka një shërbim të gjerë diplomatik dhe është vëzhgues i përhershëm në OKB.