Trumpi ngjall optimizëm mes liderëve të G7-s për fundin e luftës në Ukrainë

Presidenti i SHBA-së, Donald Trump, ka thënë se Rusia duhet të bëjë paqe me Ukrainën pas një takimi të cilin e ka vlerësuar si "shumë të mirë" me presidentin Volodymyr Zelensky, të martën në kuadër të samitit të shtatë vendeve të pasura G7.

Komentet e tij kanë ngjallur optimizëm midis udhëheqësve të G7-s se një marrëveshje paqeje mund të arrihet.

Atmosfera optimiste për luftën në Ukrainë, tani në vitin e saj të pestë, është në kontrast të fortë me takimin e Zelenskyt me Trumpin në Zyrën Ovale vitin e kaluar, kur atij iu tha se nuk kishte asnjë ndikim në bisedimet e mundshme të paqes me Rusinë.

Zelensky dhe aleatët e tij evropianë janë mbledhur në samitin e G7-s të kësaj jave në një vendpushim francez, duke shpresuar t'i bënin përshtypje Trumpit se fati i fushëbetejave të Ukrainës ishte përmirësuar falë inkursioneve të saj me dronë thellë në Rusi.

Ndërkohë Trumpi, i cili ka mbërritur në samit duke arritur paraprakisht një marrëveshje për t'i dhënë fund luftës së tij me Iranin, ka thënë se do të bënte çfarë të mundte për t'i dhënë fund konfliktit në Ukrainë, por kishte pak detaje për ndonjë hap konkret për të rritur presionin mbi Moskën. 

Kancelari gjerman, Friedrich Merz, ka thënë se deklarata e Trumpit se Rusia duhet t'i japë fund luftës ishte shkak për gëzim.

"E gjeta shumë bashkëpunues dhe gjithashtu e pashë duke dëgjuar me shumë vëmendje", u tha Merz gazetarëve. "Dhe në këtë drejtim, edhe një herë, më jep një shkallë të caktuar optimizmi se ne këtu, si evropianë dhe si amerikanë, tani po bëjmë gjithçka që mundemi, së bashku, për t'i dhënë fund luftës."

Pas takimit të grupit me Trumpin, Zelensky ka thënë për Reuters se udhëheqësit e G7-s kanë rënë dakord se Rusia nuk po e fitonte luftën. 

Ai ka thënë po ashtu se ata diskutuan gjithashtu sanksione shtesë që synonin eksportet e naftës së Rusisë, sektorin e saj bankar dhe prodhimin e saj ushtarak, duke i bërë kështu presion Moskës që të ulet në tryezën e negociatave.