Trumpi kërcënon të zhdukë plotësisht burimet e energjisë së Iranit nëse nuk arrihet një marrëveshje

Presidenti amerikan, Donald Trump, ka deklaruar të hënën se SHBA-ja është në "diskutime serioze" me një regjim të ri iranian, i cili, sipas presidentit, mund “t’i japë fund operacioneve tona ushtarake në Iran".

Në një postim në Truth Social, Trumpi ka shkruar se është bërë përparim i madh, por ka shtuar se nëse nuk arrihet një marrëveshje së shpejti, SHBA-ja do të hedhë në erë të gjitha centralet e energjisë elektrike dhe vendet e naftës të Iranit. 

"Është bërë përparim i madh, por nëse për ndonjë arsye nuk arrihet një marrëveshje së shpejti, gjë që ndoshta do të arrihet, dhe nëse Ngushtica e Hormuzit nuk bëhet menjëherë 'e Hapur për Biznes', ne do ta përfundojmë 'qëndrimin' tonë të këndshëm në Iran duke hedhur në erë dhe duke shkatërrur plotësisht të gjitha centralet e tyre të gjenerimit të energjisë elektrike, puset e naftës dhe ishullin Kharg (dhe ndoshta të gjitha centralet e desalinizimit!), të cilat qëllimisht nuk i kemi 'prekur' ende”, thuhet në postim.

"Kjo do të jetë si hakmarrje për shumë ushtarë tanë dhe të tjerë, që Irani i ka masakruar dhe vrarë gjatë 'Mbretërimit të Terrorit' 47-vjeçar të regjimit të vjetër”, thuhet më tej në deklaratë.