Trumpi i çon të fala Xi-së, Putinit e Jong Un-it: Po bëni plane kundër SHBA-së

Presidenti i SHBA-së, Donald Trump nuk ishte pjesëmarrës në paradën e “Ditës së Fitores” të mbajtur mëngjesin e së mërkurës në Pekin, e në të cilën ishin të pranishëm liderët kryesorë lindorë, presidenti rus, Vladimir Putin dhe ai i Koresë së Veriut, Kim Jong-un.

Mirëpo Trumpi ka reaguar përmes një postimi në Truth Social për ngjarjen, dhe me këtë rast ka qortuar presidentin kinez, Xi Jinping, Kimin dhe Putin për "komplot" kundër SHBA-së.

Ai ka thënë se shpreson që Kina ta vlerësojë që edhe SHBA-ja e ka ndihmuar në arritjen e fitores ndaj Japonisë, në Luftën e Dytë Botërore, shkaku për çka është zhvilluar parada ushtarake në Pekin, e në të cilën Kina ka shpalosur armatimin e saj më të ri. 

"Pyetja e madhe që kërkon përgjigje është nëse presidenti Xi i Kinës do ta përmendë apo jo sasinë masive të mbështetjes dhe "gjakderdhjes" që Shtetet e Bashkuara të Amerikës i dhanë Kinës për ta ndihmuar atë të siguronte lirinë e saj nga një pushtues i huaj shumë armiqësor. Shumë amerikanë vdiqën në përpjekjen e Kinës për Fitore dhe Lavdi. Shpresoj që ata të nderohen dhe të kujtohen me të drejtë për Trimërinë dhe Sakrificën e tyre! Uroj që presidenti Xi dhe populli i mrekullueshëm i Kinës të kenë një ditë të madhe dhe të qëndrueshme festimi. Ju lutem, dërgoni përshëndetjet e mia më të ngrohta Vladimir Putinit dhe Kim Jong Un-it, ndërsa po bëni plane kundër Shteteve të Bashkuara të Amerikës", ka shkruar Trumpi në Truth Social.