Në SHBA ka pasur thirrje për qetësi pasi një adoleshent që vrau dy persona dhe plagosi një tjetër, gjatë trazirave racore vitin e kaluar, u shpall të premten i pafajshëm në të gjitha akuzat që rëndonin mbi të.
Kyle Rittenhouse, 18, argumentoi se ai po vepronte në vetëmbrojtje kur qëlloi burrat dhe plagosi një të tretë në Wisconsin.
Vendimi i të premtes, i cili pasoi një gjyq të profilit të lartë që ndau SHBA-në, ndezi protesta në disa qytete.
Por politikanët, përfshirë presidentin Joe Biden, dhe familjet e viktimave kanë kërkuar përmbajtje.
"Ajo që na duhet tani është drejtësia, jo më shumë dhunë”, thanë në një deklaratë avokatët e familjes së Gaige Grosskreutz, i cili u qëllua dhe u plagos nga Rittenhouse.
Të njëjtën thirrje e ka bërë edhe presidenti, Joe Biden, kur është pyetur nga gazetarët për vendimin e gjykatës.
“I bëj thirrje të gjithëve që të shprehin pikëpamjet e tyre në mënyrë paqësore, në përputhje me sundimin e ligjit”, u tha Biden gazetarëve jashtë Shtëpisë së Bardhë.
Pavarësisht thirrjeve për qetësi, një trazirë shpërtheu në qytetin e Portland, Oregon, të premten në mbrëmje, pasi rreth 200 njerëz thyen xhamat dhe hodhën sende.
Kishte gjithashtu protesta në Çikago dhe Nju Jork, por ato ishin relativisht të ulëta në krahasim me trazirat e përhapura civile që SHBA-ja kishte parë më parë.
