SHBA-ja shton shtatë vende në listën e atyre që u kërkohet para për të aplikuar për vizë amerikane

Administrata Trump ka shtuar shtatë vende, përfshirë pesë në Afrikë, në listën e vendeve të qytetarëve të të cilave u kërkohet të paguajnë depozita deri në 15,000 dollarë për të aplikuar për vizë për në Shtetet e Bashkuara.

Tani, gjithsej 13 vende janë në këtë listë, nga të cilat vetëm dy nuk ndodhen në Afrikë, duke e bërë procesin e marrjes së vizës amerikane të papërballueshëm për shumë persona.

Departamenti i Shtetit shtoi javën e kaluar pa bujë Bhutan, Botswana, Republikën e Afrikës Qendrore, Guinean, Guinean-Bissau, Namibinë dhe Turkmenistanin, me efekt që nga 1 janari, sipas një njoftimi në faqen travel.state.gov.

Ky është përpjekja e fundit e administratës Trump për të ashpërsuar kërkesat për hyrje në SHBA, duke përfshirë detyrimin që qytetarët nga të gjitha vendet që kërkojnë vizë të bëjnë intervista personale dhe të dorëzojnë historikun e detajuar të mediave sociale, si dhe informacion për udhëtimet dhe vendbanimet e tyre dhe të familjeve.

Zyrtarët amerikanë kanë mbrojtur depozitat, që variojnë nga 5.000 deri në 15.000 dollarë, duke thënë se ato ndihmojnë për të siguruar që qytetarët e vendeve të përfshira nuk do të qëndrojnë jashtë ligjit. Pagesa e depozitës nuk garanton miratimin e vizës, por shuma kthehet nëse viza refuzohet ose kur mbajtësi i vizës tregon që ka respektuar kushtet e saj.

Shtetet e reja në listë i bashkohen Mauritanisë, Sao Tome dhe Principe, Tanzanisë, Gambisë, Malavit dhe Zambisë, të cilat u përfshinë në listë gjatë muajve gusht dhe tetor të vitit të kaluar.