SHBA-ja e quan “të pamatur” deklaratën nga Rusia për luftë të tretë botërore

I dërguari i presidentit amerikan, Donald Trump, Keith Kellogg, ka qortuar të mërkurën një zyrtar të lartë rus për nxitjen e frikës nga Lufta e Tretë Botërore, pasi Trumpi paralajmëroi se presidenti rus, Vladimir Putin "po luante me zjarrin" për Ukrainën.

Teksa forcat ruse po vazhdonin sulmet e rënda mbi Ukrainë, Trumpi, ka thënë në një postim në “Truth Social”, se Putini po luan me zjarrin dhe paralajmëroi se gjëra “vërtetë të këqija" do t'i kishin ndodhur tashmë Rusisë nëse nuk do të ishte Trumpi, raporton Reuters.

"Ajo që Vladimir Putini nuk e kupton është se nëse nuk do të isha unë, shumë gjëra vërtet të këqija do të kishin ndodhur tashmë në Rusi, dhe dua të them ‘vërtetë keq’. Ai po luan me zjarrin”, ka shkruar Trumpi në postim të martën.

Zyrtari i lartë rus i sigurisë, Dmitry Medvedev, një ish-president, hodhi menjëherë poshtë kritikat e Trumpit.

"Sa i përket fjalëve të Trumpit për Putinin 'që po luan me zjarrin' dhe 'gjëra vërtet të këqija' që po i ndodhin Rusisë. Unë di vetëm një gjë vërtetë të keqe - LUFTA E Tretë Botërore. Shpresoj që Trumpi ta kuptojë këtë!”, ka shkruar Medvedev në anglisht në platformën e mediave sociale X.

I dërguari i SHBA-së Kellogg citoi më pas postimin e Medvedevit duke e quajtur atë të pamatur.

"Nxitja e frikës për Luftën e Tretë Botërore është një koment fatkeq, i pamatur... dhe i papërshtatshëm për një fuqi botërore”, ka shkruar  Kellogg në X.

"Presidenti Trump po punon për të ndalur këtë luftë dhe për t'i dhënë fund vrasjeve. Ne presim marrjen e Memorandumit që ju premtuat një javë më parë. Ndalni sulmet tani”, ka shkruar Kellogg.