-
Përktheu:
Flutura Gashi-Mehmeti
- 23 prill 2024 20:36
- Shpërndaje në:
Departamenti amerikan i Drejtësisë do të paguajë 138.7 milionë dollarë për viktimat e abuzimit nga mjeku i ekipit kombëtar të gjimnastikës, Larry Nassar.
Në një padi të vitit 2022, disa nga viktimat e Nassar pretenduan se FBI-ja trajtoi keq ankesat e besueshme për sulme seksuale dhe dështoi t’i merrte ato seriozisht, raporton BBC.
139 pretenduesit përfshinin medalistët e artë të gjimnastikës olimpike të SHBA-së, Simone Biles, Aly Raisman dhe McKayla Maroney. Nassar aktualisht po vuan deri në 175 vjet burgim për sulm seksual.
Në vitin 2021, Zyra e Inspektorit të Përgjithshëm të Departamentit të Drejtësisë, e cila shërben si mbikëqyrëse për FBI-në, arriti në përfundimin se agjencia nuk i mori parasysh pretendimet për Nassar dhe bëri një sërë gabimesh.
Hetimi i FBI-së për Nassar filloi në vitin 2015, por inspektori gjeti gabime në hetim, duke përfshirë dështimin për të dokumentuar zyrtarisht takimin me zyrtarët e Gjimnastikës së SHBA-së, pasi ata përfunduan hetimin e tyre të brendshëm pesë-javor mbi sjelljen e Nassar. Hetimi përmendi gjithashtu një dështim për të kontaktuar autoritetet shtetërore dhe lokale për rrezikun e mundshëm që ai vazhdoi të paraqiste për atletët. Nassar vazhdoi të shihte pacientë për më shumë se një vit pasi akuzat kundër tij u bënë fillimisht në FBI-ja.
Shumica e pretenduesve në padi thanë se ata u sulmuan pasi abuzimi i Nassar u raportua për herë të parë në vitin 2015. Shumica ishin atletë me programin e Gjimnastikës në SHBA ose me Universitetin Shtetëror të Miçiganit, ku Nassar mbante një klinikë.
"Për dekada të tëra, Lawrence Nassar abuzoi me pozitën e tij, duke tradhtuar besimin e atyre që ishin nën kujdesin e tij dhe mbikëqyrjen mjekësore, duke e anashkaluar përgjegjësinë”, ka thënë ushtruesi i detyrës së Prokurorit të Përgjithshëm, Benjamin C Mizer.
Në një deklaratë të vitit 2022, medalistja Maroney kishte thënë se viktimat e Nassar ishin "tradhtuar nga çdo institucion që supozohej të na mbronte - Komiteti Olimpik i SHBA-së, Gjimnastika e SHBA-së, FBI-ja dhe Departamenti i Drejtësisë".
“Është e qartë se e vetmja rrugë drejt drejtësisë dhe shërimit është përmes procesit ligjor”, pati thënë ajo.
Në total, pagesat ligjore që rrjedhin si pasojë e veprimeve të Nassar dhe pasojave të tyre kanë arritur në më shumë se 1 miliard dollarë.
