-
Përktheu:
Flutura Gashi-Mehmeti
- 11 shkurt 2026 09:18
- Shpërndaje në:
Numri i trupave britanike në Norvegji do të dyfishohet gjatë tre vjetëve të ardhshme, si pjesë e përpjekjeve për të përballuar kërcënimet ruse në Rajonin e Lartë Verior.
Sekretari i Mbrojtjes, John Healey, ka thënë se numri i personelit të forcave të armatosura të vendosura në shtetin arktik do të rritet nga rreth 1,000 në 2,000.
Vendimi vjen mes shqetësimeve në rritje tek aleatët e NATO-s lidhur me aktivitetet e Rusisë në Arktik, përfshirë rihapjen e bazave të vjetra të Luftës së Ftohtë dhe shtimin e pranisë ushtarake në rajon.
“Kërkesat ndaj mbrojtjes po rriten dhe Rusia përbën kërcënimin më të madh për sigurinë në Arktik dhe në Rajonin e Lartë Verior që kemi parë që nga Lufta e Ftohtë”, ka thënë Healey.
Sekretari i Mbrojtjes do t’u bashkohet homologëve të NATO-s në selinë e aleancës në Bruksel të enjten për të diskutuar propozimet.
Arctic Sentry, e propozuar nga Sekretarja e Jashtme, Yvette Cooper, synon të forcojë mbikëqyrjen dhe sigurinë në rajon, e modeluar sipas aleancave ekzistuese të NATO-s si Baltic Sentry dhe Eastern Sentry.
Mbretëria e Bashkuar dhe aleatët e saj në NATO janë bërë gjithnjë e më të shqetësuar për rrezikun që paraqet Moska ndaj kabllove dhe tubacioneve nënujore, mes tensioneve të shtuara pas pushtimit të Ukrainës.
Vitin e kaluar, Mbretëria e Bashkuar dhe Norvegjia nënshkruan një pakt mbrojtjeje për mbrojtjen e kabllove nënujore, i cili parashikon që flotat detare të dy vendeve të operojnë një flotë të përbashkët për të gjurmuar nëndetëset ruse.
Sipas Ministrisë së Mbrojtjes (MoD), ka pasur një rritje prej 30% të nëndetëseve ruse në ujërat e Mbretërisë së Bashkuar gjatë dy vjetëve të fundit.
Ministria e Mbrojtjes ka deklaruar se aktiviteti i nëndetëseve ruse në Atlantikun e Veriut është rikthyer tani në nivelet e epokës së Luftës së Ftohtë.