Asja Isoviq nga Sarajeva ka rrëfyer historinë e letrës dërguar Mbretëreshës Elizabeta e Dytë dhe porosinë me të cilën e kishte befasuar pallati i Mbretërisë së Bashkuar. Asja shpreson se edhe mbreti i ri, Çarllsi i Tretë, do të kujdeset për të gjithë, përfshirë qentë e preferuar nga 12-vjeçarja
Mbretëresha Elizabeta e Dytë respektohej në mbarë botën për mençurinë, maturinë dhe shërbimin e saj, por për këtë vajzë boshnjake, cilësitë më të mëdha të monarkes, e cila vdiq të enjten në moshën 96-vjeçare, ishin mirësia dhe dashuria për qentë.
Kjo do ta shtynte 12-vjeçaren, Asja Isoviq, nga Sarajeva që t’i shkruante letër Mbretëreshës Elizabeth.
“Kur pashë një film për Mbretëreshën dhe qentë e saj në vitin 2019, mendova me vete; pse të mos bëja një pikturë të qenve të saj dhe t'ia dërgoja asaj, kështu që nëna ime më ndihmoi t'ia dërgoja me postë dhe i shkrova gjithashtu disa poezi dhe disa gjëra të tjera të vogla dhe ne ia dërguam asaj në Kalanë Balmoral”, ka thënë ajo.
Sarajevasja e vogël nuk do ta harrojë kurrë një ditë të vitit 2019 kur në shtëpi gjeti letrën dërguar në emër të monarkes më jetëgjatë në historinë britanike.
“Po kthehesha nga shkolla dhe nëna po kthehej nga puna dhe më priste dhe më pas më dha një letër dhe tha se ishte nga Mbretëresha. Përnjëmend u shokova dhe vërtet u befasova, dhe vërtet isha e lumtur”, ka thënë ajo.
Isoviq punoi me dorë një kartolinë të zbukuruar me një vizatim të Gardës së Mbretëreshës me tre qen në kapelë dhe ia dërgoi me postë Mbretëreshës së bashku me “disa poezi dhe disa gjëra të tjera”.
"Megjithëse në pamundësi për t'iu përgjigjur personalisht", thuhej në letër, "mbretëresha u prek nga mendimi juaj dhe e vlerëson vërtet kohën dhe kujdesin e marrë për të krijuar kartën dhe dhuratat tuaja”.
Letra forcoi adhurimin e Asja Isoviqit për Mbretëreshën, të lindur nga dashuria e përbashkët për qentë. Por e trishtoi lajmin për vdekjen e saj.
“Vërtet u mërzita dhe vërtet u shokova dhe po ndieja keqardhje në atë moment”, ka thënë ajo.
Asja shpreson se familja mbretërore do ta përballojë vdekjen e Mbretëreshës dhe se mbreti i ri, Charlesi i Tretë, do të kujdeset për familjen dhe qentë e mbretërisë.