Mbreti Charles ka shpjeguar pse nëna e tij e ndjerë, Mbretëresha Elizabeth II, zgjodhi të kalonte “ditët e saj të fundit” në rezidencën mbretërore të familjes në Balmoral, Skoci, përpara se të ndërronte jetë në vitin 2022 në moshën 96-vjeçare.
Monarku 77-vjeçar ka folur për rezidencën skoceze të familjes mbretërore në parathënien e një libri të ri udhëzues kushtuar kësaj prone, të cilën e përshkruan si një vend “të shenjtë”. Ai ka treguar se e ka dashur Balmoralin që nga fëmijëria dhe se nëna e tij e ndjerë e vlerësonte veçanërisht kohën që kalonte atje përpara vdekjes së saj në shtator të vitit 2022, në pronën e Aberdeenshire.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoNë parathënie, Charles shkruan:
“Balmoral ka qenë shtëpia e dashur skoceze e familjes sime që kur prona u ble nga Princi Albert, stër-stër-stërgjyshi im, në vitin 1852. Me ndërtesat e tij me karakter të veçantë, që nuk reshtin së mahnituri, dhe me peizazhin e tij të çmuar, pothuajse të shenjtë, përreth, ky është një vend ku gjithçka ndryshon vazhdimisht, por në të njëjtën kohë mbetet e pandryshuar, duke krijuar një ndjenjë përjetësie që e freskon shpirtin.
Që nga fëmijëria ime e hershme, ky vend ka zënë dhe vazhdon të zërë një vend të veçantë në zemrat e familjes sime dhe timen. Nëna ime e ndjerë e çmonte veçanërisht kohën e saj në Balmoral. Pikërisht këtu, në këto rrethina kaq të dashura për të, ajo zgjodhi t’i kalonte ditët e saj të fundit.”
Ai shtoi më tej:
“Pavarësisht rrethanave në të cilat po e lexoni këtë libër, shpresoj që edhe ju të frymëzoheni nga kompleksiteti i pasur i arkitekturës dhe të ndani magjinë e peizazhit përreth, natyra e egër dhe madhështore e të cilit ka qenë burim frymëzimi dhe kënaqësie për kaq shumë njerëz.”
Parathënia e Mbretit është botuar në librin udhëzues të shkruar nga Mary Miers, me titull Balmoral, së bashku me një pikturë në akuarel të kalasë, të realizuar nga vetë Charles në vitin 1989.
Balmorali ka qenë kryesisht i mbyllur për publikun gjatë viteve të fundit, me përjashtim të sallës së vallëzimit, e cila është përdorur për ekspozita arti.
Megjithatë, në vitin 2024, Mbreti Charles hapi për herë të parë dyert e kalasë për vizitorët.
Tashmë, vizitorët mund të marrin pjesë në ture të udhëhequra në ambientet e brendshme të Balmoralit, si dhe të eksplorojnë pjesën tjetër të pronës dhe kopshtet e saj. Këto përfshijnë dy labirinte në krijimin e të cilave ka kontribuar vetë Charles, si dhe një serë të ndërtuar në vitin 2002 për të shënuar Jubileun e Artë të Mbretëreshës Elizabeth II.
Balmorali tani përfshin gjithashtu një dyqan suveniresh dhe një restorant për vizitorët.