Revoltohen kinezët – kërkojnë dorëheqjen e Xisë

Gjatë protestave në Shangai - qyteti më i madh i Kinës dhe qendër globale financiare në lindje të vendit - njerëzit u dëgjuan duke bërtitur hapur parulla të tilla si "Xi Jinping, largohu" dhe "Partia komuniste, largohu!" Shumë nga protestat kanë shpërthyer në kampuset universitare – të cilat janë veçanërisht të ndjeshme politikisht ndaj Partisë Komuniste, duke pasur parasysh historinë e protestave të Sheshit Tiananmen të udhëhequr nga studentët në 1989

Protestat në Kinë kundër masave të rrepta të qeverisë ndaj COVID-19 janë intensifikuar, me disa njerëz që shprehin publikisht zemërimin e tyre ndaj drejtuesve të Partisë Komuniste. Mijëra protestues kanë dalë në Shangai, ku BBC ka parë njerëz të grumbulluar para makinave policie.

Studentët kanë demonstruar edhe në universitetet e Pekinit dhe Nanjingut. Trazirat e fundit pasojnë një protestë në qytetin e largët veriperëndimor Urumqi, ku rregullat e bllokimit u fajësuan pasi 10 njerëz vdiqën në një zjarr në një ndërtesë banimi.

“Jinping ik!”

Ndërsa autoritetet kineze mohojnë se kufizimet anti-COVID shkaktuan vdekjet, zyrtarët në Urumqi kërkuan falje të pazakontë dhe u zotuan të "rikthejnë rendin" duke hequr gradualisht kufizimet.

Gjatë protestave në Shangai - qyteti më i madh i Kinës dhe qendër globale financiare në lindje të vendit - njerëzit u dëgjuan duke bërtitur hapur parulla të tilla si "Xi Jinping, largohu" dhe "Partia komuniste, largohu!"

Disa mbanin pankarta të bardha bosh, ndërsa të tjerët ndezën qirinj dhe vendosën lule për viktimat në Urumqi. Kërkesa të tilla janë një pamje e pazakontë brenda Kinës, ku çdo kritikë e drejtpërdrejtë ndaj qeverisë dhe presidentit mund të rezultojë në dënime të ashpra.

Por analistët thonë se Qeveria duket se ka nënvlerësuar në mënyrë drastike pakënaqësinë në rritje ndaj qasjes zero-COVID, një politikë e lidhur pazgjidhshmërisht me Xi Jinpingun, i cili kohët e fundit u zotua se nuk do të shmangej prej saj.

Një protestues në Shangai i tha BBC-së se ndihej "i tronditur dhe pak i emocionuar" kur shihte njerëz në rrugë, duke e quajtur këtë si hera e parë që kishte parë disidencë kaq të gjerë në Kinë.

Ai tha se bllokimet e bënë të ndihej "i trishtuar, i zemëruar dhe i pashpresë" dhe se nuk mund ta vizitonte nënën e sëmurë, e cila po i nënshtrohej trajtimit të kancerit.

Një demonstruese i tha BBC-së se oficerët e policisë u pyetën se si ndiheshin për protestat dhe përgjigjja ishte "e njëjtë si ju". Por, tha ajo, "ata veshin uniformat e tyre kështu që po bëjnë punën e tyre."

Të tjerë dhanë rrëfime për dhunë, me një protestues që i tha agjencisë së lajmeve Associated Press se një nga miqtë e tij ishte rrahur nga policia në vendngjarje, ndërsa dy të tjerëve ishin spërkatur me piper.

Mesazhi i fletëve të zbrazëta

Njerëzit u mblodhën sërish të dielën, duke vendosur lule për viktimat e zjarrit Urumqi në zonën e rrugës Urumqi të Shangait.

Megjithatë, këto homazhe u mblodhën nga policia, e cila gjithashtu mori pjesë masivisht në vendin e protestës. BBC-ja pa oficerë policie, roje private të sigurisë dhe oficerë policie të veshur civil në rrugë, duke u përballur me protestuesit që u mblodhën për të dytën ditë.

Demonstruesit që drejtonin thirrjet anti-qeveritare u morën dhe në disa raste u goditën me grushte ose u shtynë drejt një makine policie. Fotografitë dhe videot janë shfaqur gjithashtu në internet. Ato tregojnë studentët duke nisur protestat e tyre në universitetet në Pekin dhe Nanjing të shtunën, raporton televizioni amerikan, CNN.

Qindra njerëz morën pjesë në një demonstratë të tillë në Universitetin Tsinghua në kryeqytet, tha një student për agjencinë e lajmeve AFP. Grupi mbajti fletë të zbrazëta - një akt që është bërë simbol i kundërshtimit kundër censurës kineze - dhe u filmuan duke kënduar këngë në mbështetje të lirisë dhe demokracisë.

Videot e protestave janë të vështira për t'u verifikuar në mënyrë të pavarur, por shumë prej tyre tregojnë kritikë jashtëzakonisht të qartë dhe të hapur ndaj qeverisë dhe liderit të saj. Protestat janë më të fundit në një seri të përshpejtuar demonstratash kundër masave të Kinës për zero-COVID, të cilat gjithashtu janë bërë gjithnjë e më të guximshme në kritikat ndaj qeverisë dhe Presidentit Xi.

Strategjia zero-COVID është politika e fundit e këtij lloji midis ekonomive kryesore të botës dhe është pjesërisht për shkak të niveleve relativisht të ulëta të vaksinimit të Kinës dhe një përpjekjeje për të mbrojtur të moshuarit, vlerëson CNN-ja.

"Ne kinezët duhet të jemi më të guximshëm!"

Të dielën pasdite, qindra banorë të Shangait u kthyen në vend për të vazhduar protestën, pavarësisht pranisë së madhe të policisë dhe bllokimeve rrugore. Videot treguan qindra njerëz në një kryqëzim duke bërtitur "Lërini njerëzit!" në një kërkesë që policia të lirojë demonstruesit e ndaluar.

Kësaj radhe, policia dukej se kishte adoptuar një qasje më të ashpër, duke lëvizur më shpejt dhe më agresivisht për të arrestuar dhe shpërndarë turmat. Në një video, një burrë mbajti një fjalim teksa ecte në një vendkalim për këmbësorë, ndërsa një oficer policie u përpoq ta ndalonte.

“Duhet të jemi më të guximshëm! A po shkel ligjin duke mbajtur lule?” – e pyeti turmën, e cila bërtiti "Jo!" në përgjigje.

"Ne kinezët duhet të jemi më të guximshëm!" - tha ai nën duartrokitjet e turmës. “Shumë prej nesh u arrestuan dje. Janë pa punë apo pa familje? Nuk duhet të kemi frikë!”

Burri bëri një luftë ndërsa më shumë se një duzinë oficerë e detyruan të hipte në një makinë policie, ndërsa turma e zemëruar bërtiste "Lëshojeni!" dhe nxituan drejt automjetit.

Video të tjera tregojnë skena kaotike të shtyrjes, tërheqjes zvarrë dhe rrahjes së protestuesve nga policia, raporton CNN-ja.

Në mbrëmje, pasi një protestues u tërhoq zvarrë me dhunë, qindra njerëz bërtitën "triada" ndaj policisë, sipas një transmetimi të drejtpërdrejtë.

Kampuset universitare

Shumë nga protestat kanë shpërthyer në kampuset universitare – të cilat janë veçanërisht të ndjeshme politikisht ndaj Partisë Komuniste, duke pasur parasysh historinë e protestave të Sheshit Tiananmen të udhëhequr nga studentët në 1989.

Në orët e para të mëngjesit të së dielës, rreth 100 studentë u mblodhën rreth një slogani proteste të pikturuar në një mur në Universitetin prestigjioz të Pekinit. Një student i tha CNN-së se kur mbërriti në vendngjarje rreth orës 1 të mëngjesit, rojet e sigurisë po përdornin xhaketa për të mbuluar shenjën e protestës.

“Thuaj jo bllokimit, po lirisë. Jo testit COVID, po ushqimit”, lexohej mesazhi i shkruar me bojë të kuqe, duke i bërë jehonë sloganit të një proteste që u zhvillua në një mbikalim të Pekinit në tetor, vetëm disa ditë përpara një takimi kyç të Partisë Komuniste në të cilin Xi siguroi një mandat të tretë në pushtet.

“Hapni sytë dhe shikoni botën, zero-COVID dinamik është një gënjeshtër”, shkruhej në sloganin e protestës në Universitetin e Pekinit.

Studenti tha se rojet e sigurisë më vonë e mbuluan sloganin me bojë të zezë.

Studentët më vonë u mblodhën për të kënduar “The Internationale” përpara se të shpërndaheshin nga mësuesit dhe rojat e sigurisë.