Qeveria hungareze mohon se pejxherët shpërthyes janë prodhuar në Hungari

Pejxherët e përdorur në një sulm vdekjeprurës në Liban të martën nuk ishin prodhuar në Hungari, pavarësisht lidhjeve të raportuara me një kompani me bazë në vendin e Evropës Qendrore, ka thënë të mërkurën një zëdhënës i qeverisë hungareze.

Deklarata e tij vjen pasi një kompani tajvaneze, marka tregtare e së cilës shfaqet në pejxherët që shpërthyen, tha se modelet e përdorura në Liban ishin projektuar dhe prodhuar nga distributori i saj BAC Consulting – me qendër në kryeqytetin e Hungarisë, Budapest, raporton CNN.

“Autoritetet kanë konfirmuar se kompania në fjalë është një ndërmjetëse tregtare, pa asnjë vend prodhimi apo operimi në Hungari”, ka thënë zëdhënësi i qeverisë hungareze Zoltan Kovacs në një postim në X. 

“Ai ka një menaxher të regjistruar në adresën e tij të deklaruar dhe pajisjet e referuara nuk kanë qenë kurrë në Hungari,” thuhet më tej në deklaratën e tij.

Kovacs ka shtuar se shërbimet hungareze të sigurisë kombëtare po “bashkëpunojnë me të gjitha agjencitë dhe organizatat partnere relevante ndërkombëtare”, por rasti nuk paraqet rrezik për sigurinë kombëtare.