Të paktën 109 njerëz në të gjithë Rusinë janë arrestuar të mërkurën, pasi protestuan kundër urdhrit për mobilizimin e 300 mijë rezervistëve, shkroi Reuters.
Arrestimin e mbi 100 protestuesve e bëri të ditur një grup i të drejtave të njeriut.
Grupi i pavarur i monitorimit të protestave OVD-Info, ka thënë për Reuters, se është në dijeni të arrestimeve në të paktën 15 qytete të ndryshme.
Ministri i Mbrojtjes së Rusisë, Sergey Shoigu, ka njoftuar më 21 shtator se do të mobilizohen 300 mijë rezervistë.
Presidenti i Rusisë, Vladimir Putin, ka njoftuar për mobilizim të pjesshëm ku do të përfshihen rezervistët me përvojë ushtarake dhe se kjo po ndodh për të mbrojtur “zonat e çliruara”.
Për këtë çështje kanë folur edhe nga Bashkimi Evropian e Mbretëria e Bashkuar.
Edhe
Putini akuzon Perëndimin se po përgatitet haptas për luftë me Rusinë
Pas takimit në Asamblenë e Përgjithshme të OKB-së në Nju Jork, kryeministrja e Britanisë, Liz Truss dhe presidentja e Komisionit Evropian, Ursula von der Leyen ka thënë se mobilizimi në Rusi është shenjë se pushtimi i Rusisë po dështon.
"Është një deklaratë dobësie", kanë thënë ato në një deklaratë të përbashkët, duke shtuar se do të vazhdojnë të mbështesin Ukrainën për aq kohë sa të nevojiten.
